കകാമിഗഹാര: ഏഷ്യൻ ഗെയിംസ് പുരുഷ ഹോക്കിയിൽ പാകിസ്ഥാനെ 4–3ന് തോൽപ്പിച്ച് ഇന്ത്യ ഫൈനലിൽ. ആവേശകരമായ സെമിഫൈനലിൽ അവസാന നിമിഷം അഭിഷേക് നേടിയ ഗോളാണ് ഇന്ത്യയ്ക്ക് ജയം സമ്മാനിച്ചത്.
ഹർമൻപ്രീത് സിങ് അഞ്ചാം, 13-ാം മിനിറ്റുകളിൽ പെനാൽറ്റി കോർണറിലൂടെ ഗോളുകൾ നേടി ഇന്ത്യയ്ക്ക് 2–0ന്റെ ലീഡ് നൽകി. 23-ാം മിനിറ്റിൽ സുഖ്ജീത് സിങ് മൂന്നാം ഗോൾ നേടി. എന്നാൽ 30-ാം മിനിറ്റിൽ അബു മഹ്മൂദ് പാകിസ്ഥാന്റെ ആദ്യ ഗോൾ നേടി. രണ്ടാം പകുതിയിൽ ഹന്നാൻ ഷാഹിദും വഹീദ് അഷ്റഫ് റാണയും ഗോളുകൾ നേടിയതോടെ പാകിസ്ഥാൻ 3–3ന് സമനില പിടിച്ചു.
മത്സരം അവസാനിക്കാൻ 49.2 സെക്കൻഡ് മാത്രം ശേഷിക്കെ അഭിഷേകിന്റെ ഷോട്ട് പാകിസ്ഥാൻ താരം സഫിയാൻ ഖാന്റെ സ്റ്റിക്കിൽ തട്ടി വലയിലെത്തുകയായിരുന്നു. ഇതോടെ ഇന്ത്യ 4–3ന് വിജയം ഉറപ്പിച്ച് സ്വർണമെഡൽ പോരാട്ടത്തിലേക്ക് കടന്നു.
ഒക്ടോബർ മൂന്നിനാണ് ഫൈനൽ. രണ്ടാം സെമിഫൈനലിൽ മലേഷ്യ–ദക്ഷിണ കൊറിയ മത്സരത്തിലെ വിജയിയെയാണ് ഇന്ത്യ ഫൈനലിൽ നേരിടുക.
ഇന്ത്യൻ മുന്നേറ്റനിര താരം മൻദീപ് സിങ്ങിന്റെ 300-ാം സീനിയർ അന്താരാഷ്ട്ര മത്സരവും ഇതായിരുന്നു.
