ക്യാൻബറ: പണപ്പെരുപ്പവും ഉയർന്ന പലിശനിരക്കും മൂലം പ്രതിസന്ധിയിലായ ഓസ്‌ട്രേലിയയിലെ ചെറുകിട-ഇടത്തരം സംരംഭകരെ കൂടുതൽ ദുരിതത്തിലാക്കി ഓസ്‌ട്രേലിയൻ ടാക്സേഷൻ ഓഫീസ് കൈക്കൊണ്ട തീരുമാനങ്ങൾക്കെതിരെ രാജ്യവ്യാപക പ്രതിഷേധം. ടാക്സ് ബില്ലുകളും ബിസിനസ്സ് ആക്റ്റിവിറ്റി സ്റ്റേറ്റ്മെന്റും (BAS) അടയ്ക്കാൻ വ്യാപാരികൾ ഉപയോഗിച്ചിരുന്ന ക്രെഡിറ്റ് കാർഡ് പേയ്‌മെന്റുകൾ നിർത്തലാക്കാനുള്ള എ.ടി.ഒയുടെ അഡ്മിനിസ്ട്രേറ്റീവ് നീക്കമാണ് വിവാദങ്ങൾക്ക് വഴിവെച്ചത്.
പ്രതിവർഷം 9 ലക്ഷത്തിലധികം ഡോളർ ($928,980) ശമ്പളം പറ്റുന്ന എ.ടി.ഒ കമ്മീഷണർ റോബ് ഹെഫറന്റെ നടപടികൾ കാൻബറയിലെ പാർലമെന്റിലും സെനറ്റ് എസ്റ്റിമേറ്റ്സ് ഹിയറിംഗിലും വലിയ പ്രതിഷേധത്തിന് ഇടയാക്കി. ബാങ്കുകൾ ഈടാക്കുന്ന സർചാർജുകൾ സാധാരണ വ്യാപാരികൾ നേരിട്ട് വഹിക്കേണ്ടിവരുമ്പോൾ, സ്വന്തം ചെലവ് കുറയ്ക്കാനെന്ന പേരിൽ എ.ടി.ഒ ക്രെഡിറ്റ് കാർഡുകൾ നിരസിച്ചത് ഉദ്യോഗസ്ഥരുടെ ഇരട്ടത്താപ്പാണെന്ന് വിമർശനം ഉയർന്നു. ചെറുകിട ബിസിനസ്സുകളുടെ ക്യാഷ്-ഫ്ലോ നിലനിർത്താൻ ലഭിച്ചിരുന്ന ഒരേയൊരു ആശ്വാസമാണ് ഇതിലൂടെ നഷ്ടമായത്.
സെനറ്റ് എസ്റ്റിമേറ്റ്സ് ഹിയറിംഗിൽ ക്രോസ്ബെഞ്ച് സെനറ്റർ ജാക്കി ലാംബിയും പ്രതിപക്ഷ അംഗങ്ങളും എ.ടി.ഒ മേധാവിയെ നിശിതമായി ചോദ്യം ചെയ്തു. താഴേത്തട്ടിലെ സംരംഭകരുടെ യാഥാർഥ്യങ്ങൾ അറിയാത്ത ഉദ്യോഗസ്ഥരാണ് ഇത്തരം തീരുമാനങ്ങൾ എടുക്കുന്നതെന്ന് ജനപ്രതിനിധികൾ ചൂണ്ടിക്കാട്ടി. കൃത്യമായ കൂടിയാലോചനകൾ നടത്താതെയാണ് തീരുമാനം നടപ്പിലാക്കാൻ ശ്രമിച്ചതെന്നും വ്യാപാരികളുടെ ആവശ്യങ്ങൾ വിലയിരുത്തുന്നതിൽ വീഴ്ച പറ്റിയെന്നും കമ്മീഷണർ റോബ് ഹെഫറന് സെനറ്റിൽ സമ്മതിക്കേണ്ടിവന്നു. ശക്തമായ രാഷ്ട്രീയ-ജനകീയ പ്രതിരോധത്തെ തുടർന്ന്, ക്രെഡിറ്റ് കാർഡ് പേയ്‌മെന്റ് വിലക്ക് നടപ്പാക്കുന്നത് നീട്ടിവെക്കാൻ എ.ടി.ഒ നിർബന്ധിതരായിട്ടുണ്ടെങ്കിലും, സർക്കാരിന്റെ സാമ്പത്തിക നയങ്ങൾ ചെറുകിട മേഖലയ്ക്ക് ഭീഷണിയാണെന്ന ആശങ്ക ശക്തമായി തുടരുകയാണ്.
