ന്യൂഡൽഹി: രാജ്യത്ത് എഥനോൾ മിശ്രിത പെട്രോൾ പദ്ധതി കൂടുതൽ ജനപ്രിയമാക്കുന്നതിനും പ്രോത്സാഹിപ്പിക്കുന്നതിനുമായി ചില പ്രത്യേക പെട്രോൾ വകഭേദങ്ങളുടെ കേന്ദ്ര എക്സൈസ് ഡ്യൂട്ടി കേന്ദ്ര സർക്കാർ പൂർണ്ണമായും ഒഴിവാക്കി. 22 ശതമാനം, 25 ശതമാനം, 27 ശതമാനം, 30 ശതമാനം വീതം എഥനോൾ അടങ്ങിയ ഇന്ധനങ്ങൾക്കാണ് ധനകാര്യ മന്ത്രാലയം ഇപ്പോൾ നികുതി ഇളവ് പ്രഖ്യാപിച്ചിരിക്കുന്നത്.
വിദേശ രാജ്യങ്ങളിൽ നിന്നുള്ള അസംസ്കൃത എണ്ണയുടെ (ക്രൂഡ് ഓയിൽ) ഇറക്കുമതി ചെലവ് ഗണ്യമായി കുറയ്ക്കുകയാണ് ഈ നീക്കത്തിലൂടെ കേന്ദ്ര സർക്കാർ പ്രധാനമായും ലക്ഷ്യമിടുന്നത്. ഇതിനൊപ്പം തന്നെ വാഹനങ്ങളിൽ നിന്നുള്ള കാർബൺ പുറന്തള്ളൽ നിയന്ത്രിക്കാനും പരിസ്ഥിതി മലിനീകരണം കുറയ്ക്കാനും ആഭ്യന്തര എഥനോൾ ഉൽപ്പാദനം വർദ്ധിപ്പിച്ച് കർഷകർക്ക് കൂടുതൽ വരുമാനം ഉറപ്പാക്കാനും ഈ പുതിയ നികുതി ഇളവ് സഹായിക്കുമെന്നാണ് ധനമന്ത്രാലയത്തിന്റെ വിലയിരുത്തൽ. കൂടുതൽ എഥനോൾ ചേർത്ത ഇന്ധനങ്ങൾക്ക് ഇളവ് ലഭിക്കുന്നതോടെ ഇവ കുറഞ്ഞ നിരക്കിൽ വിപണിയിൽ ലഭ്യമാക്കാൻ എണ്ണക്കമ്പനികൾക്ക് സാധിക്കും.
