ഗുരുവായൂർ: മുഖ്യമന്ത്രിയായി ചുമതലയേറ്റ ശേഷം ആദ്യമായി വി.ഡി. സതീശൻ ഗുരുവായൂർ ശ്രീകൃഷ്ണ ക്ഷേത്രത്തിൽ ദർശനം നടത്തി. ഇന്ന് രാവിലെ ഏഴു മണിയോടെയാണ് അദ്ദേഹം ക്ഷേത്രസന്നിധിയിൽ എത്തിയത്. ഗുരുവായൂരപ്പനെ തൊഴുത് പ്രാർത്ഥിച്ച മുഖ്യമന്ത്രി വെണ്ണ കൊണ്ടുള്ള തുലാഭാര വഴിപാടും സമർപ്പിച്ചു.
ക്ഷേത്രത്തിലെത്തിയ മുഖ്യമന്ത്രിയെ ഗുരുവായൂർ ദേവസ്വം ചെയർമാൻ എ.വി. ഗോപിനാഥ്, അഡ്മിനിസ്ട്രേറ്റർ ഒ.ബി. അരുൺകുമാർ എന്നിവരുടെ നേതൃത്വത്തിൽ ഔദ്യോഗികമായി സ്വീകരിച്ചു. ദേവസ്വം ചെയർമാൻ അദ്ദേഹത്തെ പൊന്നാടയണിയിച്ച് വരവേറ്റു. ദർശനത്തിന് ശേഷം നടന്ന തുലാഭാര വഴിപാടിനായി 71 കിലോഗ്രാം വെണ്ണയാണ് ഉപയോഗിച്ചത്.
മാസത്തിലൊരിക്കൽ ഗുരുവായൂർ ക്ഷേത്ര ദർശനം നടത്തുന്ന പതിവുള്ള ഭക്തൻ കൂടിയായ വി.ഡി. സതീശൻ, മുഖ്യമന്ത്രിയായ ശേഷമുള്ള ആദ്യ ദർശന സായൂജ്യം ലഭിച്ചതിന്റെ നിറവിലാണ് മടങ്ങിയത്. ഗുരുവായൂർ ദർശനം പൂർത്തിയാക്കിയ ശേഷം, റവന്യൂ മന്ത്രി എ.പി. അനിൽകുമാറിന്റെ മകന്റെ വിവാഹ ചടങ്ങിലും മുഖ്യമന്ത്രി പങ്കെടുത്തു.
