സിഡ്നി: ചൈൽഡ് കെയർ സെന്ററിലെ രണ്ട് ആൺകുട്ടികളെ മുഖത്തടിച്ചെന്ന പരാതിയിൽ 25-വയസ്സുകാരനായ ജീവനക്കാരനെ പോലീസ് അറസ്റ്റ് ചെയ്തു. സിഡ്നിയിലെ പനാനിയയിലുള്ള (Panania) ചൈൽഡ് കെയർ സെന്ററിലാണ് മനസാക്ഷിയെ മരവിപ്പിക്കുന്ന ഈ സംഭവം നടന്നത്.
കഴിഞ്ഞ വ്യാഴാഴ്ച ഉച്ചയ്ക്ക് ഒരു മണിയോടെയാണ് സംഭവം നടന്നതെന്ന് ബാങ്ക്സ്ടൗൺ പോലീസ് അറിയിച്ചു. തന്റെ സംരക്ഷണയിലുണ്ടായിരുന്ന മൂന്ന് വയസ്സുകാരനെയും നാല് വയസ്സുകാരനെയുമാണ് ഇയാൾ മർദ്ദിച്ചത്. കുട്ടികളുടെ മുഖത്ത് ഇയാൾ കൈകൊണ്ട് അടിക്കുകയായിരുന്നുവെന്നാണ് പരാതി.
പരാതിയെത്തുടർന്ന് ഇന്ന് രാവിലെ 7.45-ഓടെ ബെൽമോറിലെ (Belmore) വസതിയിൽ നിന്നാണ് ഇയാളെ പോലീസ് കസ്റ്റഡിയിലെടുത്തത്. ബാങ്ക്സ്ടൗൺ പോലീസ് സ്റ്റേഷനിൽ എത്തിച്ച പ്രതിക്കെതിരെ രണ്ട് കുറ്റകൃത്യങ്ങളിൽ കേസ് രജിസ്റ്റർ ചെയ്തു. പ്രതിയെ നാളെ കോടതിയിൽ ഹാജരാക്കും.
