തിരുവനന്തപുരം: അന്താരാഷ്ട്ര വിപണിയിലെ വിലവർധനവിനെ തുടർന്ന് ഇന്ധനവില ഉയരുമ്പോൾ സംസ്ഥാനത്തിന് ലഭിക്കുന്ന അധിക നികുതി വരുമാനം മനഃപൂർവം വേണ്ടെന്നുവെക്കുന്ന തരത്തിലുള്ള “സാമ്പത്തിക മണ്ടത്തരം” സർക്കാർ കാണിക്കില്ലെന്ന് മുഖ്യമന്ത്രി വി ഡി സതീശൻ നിയമസഭയിൽ പറഞ്ഞു. സംസ്ഥാനത്തെ വിലക്കയറ്റം സംബന്ധിച്ച് മുൻ ധനമന്ത്രി കെ എൻ ബാലഗോപാൽ അവതരിപ്പിച്ച അടിയന്തരപ്രമേയ നോട്ടീസിന് മറുപടി പറയുകയായിരുന്നു അദ്ദേഹം.
മേയ് 15 മുതൽ കേന്ദ്രസർക്കാർ നാല് തവണ ഇന്ധനവില വർധിപ്പിച്ചതായും, ഈ വർധന സംസ്ഥാനത്തിന്റെ നികുതി വരുമാനത്തിലും സാമൂഹിക-സാമ്പത്തിക മേഖലയിലും ഉണ്ടാക്കുന്ന സ്വാധീനം വിശദമായി പഠിച്ച ശേഷമേ നിയന്ത്രണ നടപടികളെക്കുറിച്ച് തീരുമാനമെടുക്കാനാകൂ എന്നും മുഖ്യമന്ത്രി വ്യക്തമാക്കി. ഇന്ധനവിലയിലെ അനിശ്ചിതത്വം അവസാനിച്ച ശേഷമേ കൃത്യമായ നയതീരുമാനം കൈക്കൊള്ളാനാകൂവെന്നും അദ്ദേഹം പറഞ്ഞു.
മുൻ യുഡിഎഫ് സർക്കാരിന്റെ കാലത്ത് ഉമ്മൻചാണ്ടി പെട്രോളിനും ഡീസലിനും മേലുള്ള അധിക നികുതി ഒഴിവാക്കി ജനങ്ങൾക്ക് ഇളവ് നൽകിയിരുന്നുവെന്ന് മുഖ്യമന്ത്രി ചൂണ്ടിക്കാട്ടി. എന്നാൽ 2016 മുതൽ 2025 വരെയുള്ള ഇടതുസർക്കാരിന്റെ കാലത്ത് ഇന്ധനവില വർധനയിലൂടെ ലഭിച്ച അധിക വരുമാനത്തിൽ നിന്ന് ജനങ്ങൾക്ക് യാതൊരു ഇളവും നൽകിയില്ലെന്നും അദ്ദേഹം ആരോപിച്ചു.
ഇന്ധനവില വർധനയിലൂടെ ലഭിക്കുന്ന അധിക വരുമാനം സംസ്ഥാനത്തിന് ആവശ്യമാണെന്നും അത് ഉപേക്ഷിക്കാനാവില്ലെന്നും മുൻ ധനമന്ത്രി തോമസ് ഐസക് നിയമസഭയിൽ പറഞ്ഞിട്ടുണ്ടെന്നും മുഖ്യമന്ത്രി ഓർമിപ്പിച്ചു. അതേ നിലപാടിൽ നിന്ന് വ്യത്യസ്തമായി ഇപ്പോഴത്തെ സർക്കാർ പ്രവർത്തിക്കണമെന്നാണ് പ്രതിപക്ഷം ആവശ്യപ്പെടുന്നതോയെന്നും അദ്ദേഹം ചോദിച്ചു. ഇന്ധനവില വർധന, നികുതി വരുമാനം, വിലക്കയറ്റം എന്നിവ ചർച്ചയായതോടെ വിഷയം നിയമസഭയിൽ ഭരണ-പ്രതിപക്ഷ വാക്പോരിന് വഴിവെച്ചു.
