തിരുവനന്തപുരം: സംസ്ഥാനത്തിന്റെ സാമ്പത്തിക സ്ഥിതിയെക്കുറിച്ച് യുഡിഎഫ് സർക്കാർ പുറത്തിറക്കിയ ധവളപത്രത്തിന് മറുപടിയായി ബദൽ ധവളപത്രം പുറത്തിറക്കാൻ സിപിഎം തീരുമാനിച്ചു. എൽഡിഎഫിൽ ചർച്ച നടത്തിയ ശേഷം മുന്നണിയുടെ ഔദ്യോഗിക രേഖയായാണ് ഇത് പ്രസിദ്ധീകരിക്കാൻ ആലോചിക്കുന്നത്. മുൻ ധനമന്ത്രിമാരായ കെ എൻ ബാലഗോപാൽ, തോമസ് ഐസക്ക് എന്നിവർ ബദൽ ധവളപത്രത്തിന്റെ തയ്യാറെടുപ്പിന് നേതൃത്വം നൽകും.
എൽഡിഎഫ് ഭരണകാലത്ത് സാമ്പത്തിക മാനേജ്മെന്റിലും ജനക്ഷേമ പദ്ധതികളിലും സ്വീകരിച്ച നയങ്ങളും നടപ്പാക്കിയ നടപടികളും രേഖയിൽ വിശദീകരിക്കുമെന്ന് സിപിഎം അറിയിച്ചു. യുഡിഎഫ് പുറത്തിറക്കിയ ധവളപത്രത്തിൽ എൽഡിഎഫ് സർക്കാരിന്റെ കാലത്ത് ഉണ്ടായ വരുമാന വർധനയും സാമ്പത്തിക നേട്ടങ്ങളും പരാമർശിക്കാതെ പോയെന്നാണ് സിപിഎമ്മിന്റെ പ്രധാന ആരോപണം. ഇതുസംബന്ധിച്ച കണക്കുകളും വിശദീകരണങ്ങളും ബദൽ രേഖയിൽ ഉൾപ്പെടുത്തുമെന്ന് പാർട്ടി നേതാക്കൾ വ്യക്തമാക്കുന്നു.
ക്ഷേമപെൻഷൻ വിതരണം, പൊതുമേഖലാ സ്ഥാപനങ്ങളുടെ സംരക്ഷണം, അടിസ്ഥാന സൗകര്യ വികസനം തുടങ്ങിയ മേഖലകളിൽ എൽഡിഎഫ് ഭരണകാലത്തെയും മുൻ യുഡിഎഫ് ഭരണകാലത്തെയും താരതമ്യം ചെയ്യുന്ന വിവരങ്ങളും ബദൽ ധവളപത്രത്തിലുണ്ടാകുമെന്നാണ് റിപ്പോർട്ട്.
സംസ്ഥാനത്തിന്റെ ധനസ്ഥിതിയെക്കുറിച്ച് വിലയിരുത്തുന്നതിനായി യുഡിഎഫ് സർക്കാർ നേരത്തെ വിദഗ്ധ സമിതിയെ നിയോഗിച്ച് ധവളപത്രം തയ്യാറാക്കിയിരുന്നു. ആ രേഖയിൽ സംസ്ഥാനത്തിന്റെ കടബാധ്യത, പൊതുമേഖലാ സ്ഥാപനങ്ങളുടെ സാമ്പത്തിക സ്ഥിതി, ധനകാര്യ വെല്ലുവിളികൾ തുടങ്ങിയ വിഷയങ്ങൾ ചർച്ച ചെയ്തിരുന്നു.
