തിരുവനന്തപുരം: പിഎസ്‌സി പരീക്ഷാ തട്ടിപ്പുമായി ബന്ധപ്പെട്ട് ക്രൈംബ്രാഞ്ച് നടത്തിയ ചോദ്യം ചെയ്യലിൽ ചെയർമാനും മറ്റ് അംഗങ്ങളും നൽകിയ മൊഴികളിൽ പ്രകടമായ വൈരുധ്യം. പരീക്ഷയുമായി ബന്ധപ്പെട്ട എല്ലാ തീരുമാനങ്ങളും കൂട്ടായി എടുത്തതാണെന്നാണ് പിഎസ്‌സി ചെയർമാൻ എം.ആർ. ബൈജു ക്രൈംബ്രാഞ്ചിന് മൊഴി നൽകിയത്. എന്നാൽ, പ്രധാനപ്പെട്ട പല തീരുമാനങ്ങളും അംഗങ്ങളോട് ആലോചിക്കാതെ ചെയർമാൻ ഒറ്റയ്ക്കാണ് കൈക്കൊള്ളുന്നതെന്നാണ് ചില അംഗങ്ങൾ അന്വേഷണ സംഘത്തിന് നൽകിയിരിക്കുന്ന വിവരം.
കേസിലെ പ്രധാന പ്രതിയായ അഡീഷണൽ ചീഫ് സെക്രട്ടറി ആർ. ഹരിയും ചെയർമാൻ എം.ആർ. ബൈജുവും തമ്മിൽ അടുത്ത ബന്ധമുണ്ടെന്നും ചില അംഗങ്ങൾ മൊഴി നൽകിയിട്ടുണ്ട്. പ്രതിയായ ആർ. ഹരി ഇപ്പോഴും ഒളിവിൽ തുടരുകയാണ്; ഇയാളുടെ വീട് പൂട്ടിയ നിലയിലാണ്. അതിനിടെ, കേസിൽ നേരത്തെ അറസ്റ്റിലായ മുൻ ഡെപ്യൂട്ടി സെക്രട്ടറി സതീഷിനെ കോടതി റിമാൻഡ് ചെയ്തു.
ഉദ്യോഗസ്ഥരായ ഹരിയെയും സതീഷിനെയും പൂർണ്ണമായും സംരക്ഷിക്കുന്ന നിലപാടാണ് ചോദ്യം ചെയ്യലിൽ ചെയർമാൻ സ്വീകരിച്ചത്. ആസൂത്രണ ബോർഡ് പരീക്ഷയിലെ പത്ത് ചോദ്യങ്ങളുടെ മൂല്യനിർണ്ണയം നടക്കാതെ പോയത് ബോധപൂർവ്വമായ വീഴ്ചയല്ലെന്നും സാങ്കേതിക തകരാർ മാത്രമാണെന്നുമുള്ള ചെയർമാന്റെ വാദം ക്രൈംബ്രാഞ്ച് പൂർണ്ണമായി മുഖവിലയ്ക്കെടുത്തിട്ടില്ല. ഇതിന്റെ പശ്ചാത്തലത്തിൽ ചെയർമാനെ വീണ്ടും വിശദമായി ചോദ്യം ചെയ്തേക്കും. പിഎസ്‌സിയിലെ മുഴുവൻ അംഗങ്ങളെയും ചോദ്യം ചെയ്ത ശേഷമായിരിക്കും ചെയർമാനെ വീണ്ടും വിളിപ്പിക്കുക.
അതേസമയം, അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ (AMVI) പരീക്ഷാ ക്രമക്കേടിൽ പിഎസ്‌സിക്കെതിരെ മറ്റൊരു കേസ് കൂടി രജിസ്റ്റർ ചെയ്തിട്ടുണ്ട്. പരീക്ഷയിലെ ഭൂരിഭാഗം ചോദ്യങ്ങളും ഒരു പ്രത്യേക ഗൈഡിൽ നിന്ന് അതേപടി പകർത്തിയതാണെന്ന പരാതിയെ തുടർന്നാണ് അന്വേഷണ സംഘം പുതിയ നടപടിയിലേക്ക് കടന്നത്.
