സിഡ്നി: പ്രമുഖ ഓസ്ട്രേലിയൻ സ്പോർട്സ് റിപ്പോർട്ടർ ദാനിക മാസൺ താൻ അമ്മയാകാൻ പോകുന്ന സന്തോഷവാർത്ത തത്സമയ സംപ്രേക്ഷണത്തിനിടെ പങ്കുവെച്ചു. ‘ടുഡേ’ (Today) ഷോയിൽ വെച്ചാണ് താനും പ്രതിശ്രുത വരൻ ലിയാം നൈറ്റും ആദ്യത്തെ കുഞ്ഞിനായി കാത്തിരിക്കുകയാണെന്ന വിവരം ദാനിക വെളിപ്പെടുത്തിയത്.
“ഞാനും ലിയാമും ഒരു കുഞ്ഞിനായുള്ള കാത്തിരിപ്പിലാണ്. ‘ടുഡേ’ ഷോയിൽ ഇപ്പോൾ ശരിക്കും ഒരു ‘ബേബി ബൂം’ ആണ് നടക്കുന്നത്,” സഹപ്രവർത്തകയും ഈയിടെ ഗർഭിണിയാണെന്ന് വെളിപ്പെടുത്തിയതുമായ സാറ അബോയെ പരാമർശിച്ച് ദാനിക പറഞ്ഞു. തങ്ങൾക്ക് പിറക്കാൻ പോകുന്നത് പെൺകുഞ്ഞാണെന്നും ഡിസംബറിലാണ് പ്രസവ തീയതിയെന്നും അവർ കൂട്ടിച്ചേർത്തു. ഗർഭകാലത്തിന്റെ തുടക്കത്തിൽ ശാരീരിക അസ്വസ്ഥതകൾ ഉണ്ടായിരുന്നെങ്കിലും ഇപ്പോൾ ആരോഗ്യനില മെച്ചപ്പെട്ടതായും ദാനിക വ്യക്തമാക്കി.
ജോലിക്കിടയിലുള്ള അസ്വസ്ഥതകളിലും സഹപ്രവർത്തകർ വലിയ പിന്തുണയാണ് നൽകിയതെന്ന് അവർ പറഞ്ഞു. 2024 ഫെബ്രുവരിയിൽ പ്രണയത്തിലായ ദാനികയും ലിയാമും 2025 ഒക്ടോബറിലാണ് വിവാഹനിശ്ചയം നടത്തിയത്.
