കാൻബറ: ഓസ്ട്രേലിയയിലെ വയോജന പരിചരണ മേഖലയിൽ സേവനദാതാക്കൾ അമിതവും അന്യായവുമായ നിരക്കുകൾ ഈടാക്കുന്നതായി കണ്ടെത്തിയതിനെ തുടർന്ന് മൂന്ന് ലക്ഷം ഡോളറിലധികം (300,000+ ഓസ്ട്രേലിയൻ ഡോളർ) ഗുണഭോക്താക്കൾക്ക് തിരികെ നൽകാൻ ഉത്തരവ്. സർക്കാരിന്റെ ‘സപ്പോർട്ട് അറ്റ് ഹോം’ പദ്ധതിയെക്കുറിച്ച് നടത്തിയ കർശന പരിശോധനകൾക്ക് ശേഷമാണ് ഈ നടപടി.
പദ്ധതിക്ക് കീഴിൽ വയോജനങ്ങളിൽ നിന്ന് ഞെട്ടിക്കുന്ന രീതിയിലുള്ള കൊള്ളയാണ് ചില ഏജൻസികൾ നടത്തിയതെന്ന് റിപ്പോർട്ടുകൾ വ്യക്തമാക്കുന്നു. 20 ഡോളർ മാത്രം വിലവരുന്ന സ്മൂത്തികൾക്ക് 100 ഡോളറിലധികം ഈടാക്കിയതായും ചില നഴ്സിംഗ് സന്ദർശനങ്ങൾക്ക് മണിക്കൂറിന് 180 ഡോളറോ അതിൽ കൂടുതലോ വാങ്ങിയതായും കണ്ടെത്തിയിട്ടുണ്ട്. കൂടാതെ, 2025 മാർച്ചിനും 2026 മാർച്ചിനും ഇടയിൽ വ്യക്തിഗത പരിചരണത്തിനുള്ള (Personal Care) ശരാശരി ഫീസ് മണിക്കൂറിന് 77 ഡോളറിൽ നിന്ന് 113 ഡോളറായി കുതിച്ചുയർന്നതും വയോജനങ്ങളെ വലിയ സാമ്പത്തിക പ്രതിസന്ധിയിലാക്കി.
വയോജനങ്ങൾക്ക് സ്വന്തം വീടുകളിൽ തന്നെ തുടരാനും പരസഹായമില്ലാതെ ജീവിക്കാനും സഹായിക്കുന്നതിനായി 2025 നവംബറിലാണ് 10 ബില്യൺ ഡോളർ ചെലവുള്ള ‘സപ്പോർട്ട് അറ്റ് ഹോം’ പദ്ധതി ഓസ്ട്രേലിയൻ സർക്കാർ ആരംഭിച്ചത്. എന്നാൽ, നികുതിദായകരുടെ പണം ഉപയോഗിച്ച് നടത്തുന്ന ഈ പദ്ധതിയിൽ സുതാര്യതയില്ലായ്മയും ഉത്തരവാദിത്തമില്ലായ്മയും വ്യാപകമാണെന്ന് റെഗുലേറ്ററി പരിശോധനയിൽ വ്യക്തമായി. അന്യായമായ നിരക്കുകളിലൂടെ നഷ്ടപ്പെടുന്ന ഓരോ ഡോളറും, അവശത അനുഭവിക്കുന്ന വയോജനങ്ങൾക്ക് ലഭിക്കേണ്ട അവശ്യ പരിചരണത്തിൽ നിന്നാണ് ചോർന്നുപോകുന്നതെന്ന ഗുരുതരമായ ആശങ്കയാണ് ഇപ്പോൾ ഉയരുന്നത്.

