കൊച്ചി: എറണാകുളം ജില്ലയിലെ പുതുവൈപ്പിന് സമീപം മത്സ്യബന്ധനത്തിനിടെ വള്ളം മറിഞ്ഞുണ്ടായ അപകടത്തിൽ രണ്ട് മത്സ്യത്തൊഴിലാളികൾ മരിച്ചു. പുതുവൈപ്പ് സ്വദേശികളായ ദേവസിയും ബാബുവുമാണ് മരിച്ചത്.
ശനിയാഴ്ച പുലർച്ചെ മത്സ്യബന്ധനത്തിനായി കടലിലേക്ക് പോയ വള്ളമാണ് അപകടത്തിൽപ്പെട്ടത്. വള്ളം കടലിൽ തലകീഴായി മറിയുകയായിരുന്നു. രക്ഷാപ്രവർത്തനത്തിനൊടുവിൽ ഇവരെ പുറത്തെടുത്തെങ്കിലും ജീവൻ രക്ഷിക്കാനായില്ല. മൃതദേഹങ്ങൾ എറണാകുളം ജനറൽ ആശുപത്രിയിലേക്ക് മാറ്റി.
അപകടസമയത്ത് വള്ളത്തിൽ അഞ്ച് പേരുണ്ടായിരുന്നു. ഒരാൾ ജനറൽ ആശുപത്രിയിൽ ചികിത്സയിലാണ്. മറ്റ് രണ്ട് മത്സ്യത്തൊഴിലാളികളുടെ ആരോഗ്യനില തൃപ്തികരമാണെന്ന് അധികൃതർ അറിയിച്ചു. അപകടത്തിന്റെ സാഹചര്യങ്ങളെക്കുറിച്ച് അന്വേഷണം തുടരുകയാണ്.
