ശ്രീനഗർ: ജമ്മു കശ്മീരിലെ വിവിധ മേഖലകളിൽ കനത്ത മഴയെ തുടർന്ന് വെള്ളപ്പൊക്കസമാന സാഹചര്യം രൂപപ്പെട്ടു. പൂഞ്ച് ജില്ലയിലെ മെന്ധാർ ഉപവിഭാഗത്തിൽ വെള്ളക്കെട്ടിൽ അകപ്പെട്ട 25 പേരെ പോലീസ് ഉൾപ്പെടെയുള്ള രക്ഷാസേന സുരക്ഷിതമായി ഒഴിപ്പിച്ചതായി അധികൃതർ അറിയിച്ചു.
തുടർച്ചയായ മഴയെ തുടർന്ന് താഴ്ന്ന പ്രദേശങ്ങളിൽ വെള്ളം കയറിയതോടെ ഗതാഗതം തടസ്സപ്പെടുകയും ജനജീവിതം ദുരിതത്തിലാകുകയും ചെയ്തു. ചില മേഖലകളിൽ ചെറുനദികളും തോടുകളും കരകവിഞ്ഞൊഴുകിയതായും അധികൃതർ അറിയിച്ചു.
അതേസമയം, ഡോഡ ജില്ലയിൽ ശക്തമായ മഴയെ തുടർന്ന് മിന്നൽപ്രളയവും മണ്ണിടിച്ചിലും ഉണ്ടായതായി റിപ്പോർട്ടുണ്ട്. വീടുകൾക്കും കടകൾക്കും റോഡുകൾക്കും നാശനഷ്ടമുണ്ടായിട്ടുണ്ട്. മഴ തുടരുമെന്ന കാലാവസ്ഥാ മുന്നറിയിപ്പിന്റെ പശ്ചാത്തലത്തിൽ ജനങ്ങൾ ജാഗ്രത പാലിക്കണമെന്ന് ഭരണകൂടം നിർദേശിച്ചിട്ടുണ്ട്.
