അഡ്ലെയ്ഡ്: സൗത്ത് ഓസ്ട്രേലിയയിൽ നിന്നും കാണാതായ ഗസ് ലാമൊണ്ട് (Gus Lamont) എന്ന കൊച്ചുബാലനായുള്ള പുതിയ തിരച്ചിലും പരാജയപ്പെട്ടു. കഴിഞ്ഞ എട്ട് മാസത്തിനിടെ നടത്തിയ പതിനൊന്നാമത്തെ വിപുലമായ തിരച്ചിലാണിത്. ഇത്രയധികം തിരച്ചിലുകൾ നടത്തിയിട്ടും കുട്ടിയെക്കുറിച്ചോ കുട്ടി എവിടെയുണ്ടെന്നതിനെക്കുറിച്ചോ യാതൊരുവിധ തെളിവുകളോ സൂചനകളോ കണ്ടെത്താൻ പോലീസിന് കഴിഞ്ഞിട്ടില്ല.
കഴിഞ്ഞ വർഷം സെപ്റ്റംബർ 27-നാണ് സൗത്ത് ഓസ്ട്രേലിയയിലെ യുന്റയ്ക്ക് (Yunta) സമീപമുള്ള ‘ഓക്ക് പാർക്ക് സ്റ്റേഷൻ’ എന്ന ഫാം ഹൗസിന് പുറത്തെ മണൽക്കൂനയിൽ ഗസ് കളിച്ചുകൊണ്ടിരിക്കുന്നത് അവസാനമായി കണ്ടത്. കുട്ടിയുടെ അമ്മവഴിയുള്ള മുത്തശ്ശീമുത്തശ്ശന്മാരായ ജോസി, ഷാനൻ മറെ എന്നിവരുടെ ഉടമസ്ഥതയിലുള്ളതാണ് ഈ പ്രദേശം.
ഡിറ്റക്ടീവുകളും സ്പെഷ്യലിസ്റ്റ് സ്റ്റാർ ഗ്രൂപ്പ് (STAR Group) ഉദ്യോഗസ്ഥരും ഈ ആഴ്ച വീണ്ടും ഓക്ക് പാർക്ക് സ്റ്റേഷനിലെ പുതിയ സ്ഥലങ്ങളിൽ വിശദമായ പരിശോധന നടത്തിയെങ്കിലും ഫലമുണ്ടായില്ല. ഇതിന് പിന്നാലെ വ്യാഴാഴ്ച ഫാം ഹൗസിൽ വെച്ച് മേജർ ക്രിമിനൽ ഇൻവെസ്റ്റിഗേഷൻ ബ്രാഞ്ച് ഓഫീസർ ഇൻ-ചാർജ് ഡിറ്റക്ടീവ് സൂപ്രണ്ട് ഡാരൻ ഫീൽക്കെ അന്വേഷണ പുരോഗതി മാധ്യമങ്ങളോട് വിശദീകരിച്ചു. ദൗർഭാഗ്യവശാൽ ഗസിനെ കണ്ടെത്താൻ സഹായിക്കുന്ന യാതൊരു തെളിവും ഇതുവരെ ലഭിച്ചിട്ടില്ലെന്ന് അദ്ദേഹം പറഞ്ഞു. തിരച്ചിലിന്റെ ഭാഗമായി ഉദ്യോഗസ്ഥർ ഇതുവരെ മുപ്പതിലധികം കിലോമീറ്റർ നീളത്തിൽ ജലാശയങ്ങളും തോടുകളും നടന്ന് പരിശോധിച്ചതായും അദ്ദേഹം വ്യക്തമാക്കി.
കുട്ടിയെ കാണാതായ സംഭവത്തിൽ മുത്തശ്ശീമുത്തശ്ശന്മാരിൽ ഒരാൾ ഇപ്പോഴും സംശയനിഴലിലാണെന്ന് സൂപ്രണ്ട് സ്ഥിരീകരിച്ചെങ്കിലും, അന്വേഷണം നിലനിൽക്കുന്നതിനാൽ കൂടുതൽ വിവരങ്ങൾ വെളിപ്പെടുത്താൻ അദ്ദേഹം തയ്യാറായില്ല. നിലവിൽ ഈ കേസിൽ മറ്റ് പ്രതികളെയോ സംശയിക്കേണ്ട മറ്റ് വ്യക്തികളെയോ കണ്ടെത്താനായിട്ടില്ലെന്നും അദ്ദേഹം കൂട്ടിച്ചേർത്തു.
കഴിഞ്ഞ എട്ട് മാസത്തിനിടെ ഈ ഉൾപ്രദേശത്ത് ഇത്രയധികം വിപുലമായ തിരച്ചിലുകൾ നടത്തിയിട്ടും ഒരു തെളിവ് പോലും ലഭിക്കാത്തത് അസ്വാഭാവികമല്ലേ എന്ന മാധ്യമപ്രവർത്തകരുടെ ചോദ്യത്തിന്, ‘അത് വിശദീകരിക്കാൻ പ്രയാസമാണ്’ എന്നായിരുന്നു അദ്ദേഹത്തിന്റെ മറുപടി. “ഞങ്ങൾ ഇതിനായി ഒരുപാട് സമയവും കഠിനാധ്വാനവും വൈകാരികമായ ഊർജ്ജവും ചിലവഴിച്ചിട്ടുണ്ട്. ഞങ്ങൾ ഇപ്പോഴും പ്രതീക്ഷ കൈവിട്ടിട്ടില്ല. ഒന്നും കണ്ടെത്താൻ കഴിയാത്തതിൽ വലിയ നിരാശയുണ്ട്. എന്നാൽ ഇവിടുത്തെ ഭൂപ്രകൃതി എങ്ങനെയുള്ളതാണെന്ന് നിങ്ങൾ തന്നെ കാണുന്നതാണ്, ഇത് നഗരമല്ല,” ഫീൽക്കെ പറഞ്ഞു.
ഈ വർഷം ആദ്യം നടത്തിയ പരിശോധനകളുടെ ഭാഗമായി പോലീസ് ഇവിടെ നിന്നും ഒരു കാറും മോട്ടോർ സൈക്കിളും ചില ഇലക്ട്രോണിക് ഉപകരണങ്ങളും പിടിച്ചെടുത്തിരുന്നു. ഇവ വിശദമായ ഫോറൻസിക് പരിശോധനയ്ക്ക് വിധേയമാക്കിയെങ്കിലും അന്വേഷണത്തിന് സഹായകരമായ പുതിയ വിവരങ്ങളോ വഴിത്തിരിവുകളോ ഇതിൽ നിന്നും ലഭിച്ചില്ല.
‘ടാസ്ക്ഫോഴ്സ് ഹൊറൈസൺ’ (Taskforce Horizon) ഉദ്യോഗസ്ഥർ കേസിൽ തെളിവുകൾക്കായുള്ള അന്വേഷണം തുടരുകയാണ്. ഇതിന്റെ ഭാഗമായി ഈ ഫാം ഹൗസിന്റെ വലിയൊരു പരിധിയിൽ വീണ്ടും വ്യോമനിരീക്ഷണം (Aerial Survey) നടത്താൻ തീരുമാനിച്ചിട്ടുണ്ട്. മുൻപ് ഫാം ഹൗസിന് ചുറ്റുമുള്ള 15 കിലോമീറ്റർ ചുറ്റളവിൽ ഡ്രോണുകൾ ഉപയോഗിച്ച് വ്യോമനിരീക്ഷണം നടത്തിയിരുന്നു. അന്ന് ലഭിച്ച ദൃശ്യങ്ങൾ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗിച്ചാണ് വിശകലനം ചെയ്തത്. നിലവിലുണ്ടായ കാലാവസ്ഥാ വ്യതിയാനങ്ങൾക്ക് പിന്നാലെ ഈ പ്രദേശങ്ങളിൽ വീണ്ടും വ്യോമനിരീക്ഷണം നടത്താനുള്ള ഒരുക്കത്തിലാണ് പോലീസ്. വരും ആഴ്ചകളിൽ നടക്കുന്ന ഈ പരിശോധനയിലും ദൃശ്യങ്ങൾ വിശകലനം ചെയ്യാൻ എഐ സാങ്കേതികവിദ്യയുടെ സഹായം തേടുമെന്ന് പോലീസ് അറിയിച്ചു.
