കീവ്: റഷ്യൻ സൈന്യം ഉക്രെയിനിലെ വിവിധ പ്രദേശങ്ങളിൽ നടത്തിയ ആക്രമണങ്ങളിൽ നാല് പേർ കൊല്ലപ്പെട്ടു. ആക്രമണത്തിൽ നിരവധി പേർക്ക് പരിക്കേറ്റതായും ഉക്രെയിൻ അധികൃതർ അറിയിച്ചു. ആക്രമണത്തെ തുടർന്ന് പാർപ്പിട കെട്ടിടങ്ങൾക്കും മറ്റ് സിവിലിയൻ അടിസ്ഥാനസൗകര്യങ്ങൾക്കും നാശനഷ്ടമുണ്ടായി.
വടക്കുകിഴക്കൻ മേഖലയായ സുമിയിൽ ഒരു കുടുംബത്തിലെ മൂന്ന് പേർ കൊല്ലപ്പെട്ടതായി ഉക്രെയിൻ പ്രസിഡന്റ് വൊളാഡിമർ സെലൻസ്കി അറിയിച്ചു. മരിച്ചവരിൽ 13 വയസ്സുള്ള ഒരു കുട്ടിയും ഉൾപ്പെടുന്നു. മറ്റൊരു ആക്രമണത്തിൽ ഒരു വിദേശ ചരക്കുകപ്പലിലുണ്ടായിരുന്ന ഈജിപ്ഷ്യൻ നാവികനും കൊല്ലപ്പെട്ടു.
റഷ്യ വ്യാപകമായ ഡ്രോൺ, മിസൈൽ ആക്രമണങ്ങൾ തുടരുന്നതിനിടെ ഉക്രെയിനും റഷ്യൻ സൈനിക-വ്യാവസായിക കേന്ദ്രങ്ങൾ ലക്ഷ്യമിട്ട് തിരിച്ചടി ആക്രമണങ്ങൾ ശക്തമാക്കിയിട്ടുണ്ട്.
റഷ്യ–ഉക്രെയിൻ യുദ്ധം അഞ്ചാം വർഷത്തിലേക്ക് കടന്ന സാഹചര്യത്തിൽ ഇരുരാജ്യങ്ങളും തമ്മിലുള്ള ആക്രമണങ്ങൾ കൂടുതൽ രൂക്ഷമാകുകയാണ്. സമാധാനശ്രമങ്ങൾ തുടരുന്നുണ്ടെങ്കിലും യുദ്ധഭൂമിയിലെ സംഘർഷങ്ങൾക്ക് ഇതുവരെ ശമനമായിട്ടില്ലെന്ന് അന്താരാഷ്ട്ര നിരീക്ഷകർ വിലയിരുത്തുന്നു.
