ജർമ്മനിയിൽ ചരക്കുതീവണ്ടികൾ കൂട്ടിയിടിച്ചു; ഒരാൾ മരിച്ചു
മ്യൂണിക്: ജർമ്മനിയിലെ മ്യൂണിക്കിൽ രണ്ട് ചരക്കുതീവണ്ടികൾ കൂട്ടിയിടിച്ചുണ്ടായ അപകടത്തിൽ ഒരാൾ മരിച്ചു. ശനിയാഴ്ച പുലർച്ചെയായിരുന്നു അപകടം.
റെയിൽവേ പാലത്തിനുമുകളിലുണ്ടായ കൂട്ടിയിടിയെ തുടർന്ന് ട്രെയിനിന്റെ രണ്ട് വാഗണുകൾ പാളം തെറ്റി പാലത്തിൽ നിന്ന് താഴെയുള്ള റോഡിലേക്ക് പതിച്ചു. അപകടസമയത്ത് വാഗണുകൾ ശൂന്യമായിരുന്നതിനാൽ പൊതുജനങ്ങൾക്ക് കൂടുതൽ അപകടമുണ്ടായില്ലെന്നും അധികൃതർ അറിയിച്ചു. മറ്റ് ആളുകൾക്ക് പരിക്കേറ്റതായി റിപ്പോർട്ടുകളില്ല.
അപകടത്തെ തുടർന്ന് പാലത്തിനടിയിലൂടെയുള്ള റോഡ് ഗതാഗതത്തിനായി അടച്ചിരിക്കുകയാണ്. വാഗണുകൾ മാറ്റുന്നതിനും പാത ശുചീകരിക്കുന്നതിനുമുള്ള പ്രവർത്തനങ്ങൾ തുടരുകയാണ്. ചരക്കുതീവണ്ടികൾ മാത്രം ഉപയോഗിക്കുന്ന റെയിൽപാതയിലാണ് അപകടമുണ്ടായതെന്ന് റെയിൽവേ അധികൃതർ അറിയിച്ചു. അതിനാൽ പ്രാദേശിക, ദീർഘദൂര യാത്രാ ട്രെയിൻ സർവീസുകളെ സംഭവം ബാധിച്ചിട്ടില്ല.
അപകടത്തിന്റെ കാരണം കണ്ടെത്താൻ ജർമ്മൻ പൊലീസ് അന്വേഷണം ആരംഭിച്ചു.
