തിരുവനന്തപുരം: നവകേരള യാത്രയ്ക്കിടെ യൂത്ത് കോൺഗ്രസ് പ്രവർത്തകരെ മർദിച്ച സംഭവത്തിൽ മുൻ മുഖ്യമന്ത്രിയുടെ സുരക്ഷാ സംഘത്തിലുണ്ടായിരുന്ന ഗൺമാൻമാർക്കെതിരെ നരഹത്യാശ്രമം ചുമത്തി പ്രത്യേക അന്വേഷണ സംഘം (എസ്ഐടി) കോടതിയിൽ റിപ്പോർട്ട് സമർപ്പിച്ചു. ഇതോടെ കോടതിയിൽ കീഴടങ്ങാനിരുന്ന പ്രതികൾ ഒളിവിൽ പോയതായി റിപ്പോർട്ടുകളുണ്ട്.
ഗൺമാൻ അനിൽ കുമാർ, സുരക്ഷാ ഉദ്യോഗസ്ഥൻ എസ്. സന്ദീപ്, പോലീസ് ഉദ്യോഗസ്ഥരായ ഷൈജു, അരുൺ, വിപിൻ എന്നിവർക്കെതിരെയാണ് നടപടി. സംഭവവുമായി ബന്ധപ്പെട്ട് ഇവർ ഉൾപ്പെടെ അഞ്ച് പേർക്ക് നേരത്തെ സസ്പെൻഷൻ ലഭിച്ചിരുന്നു. എസ്ഐടി സമർപ്പിച്ച റിപ്പോർട്ടിൽ അഞ്ചുപേരെയും പ്രതികളാക്കിയതായും ആലപ്പുഴ മജിസ്ട്രേറ്റ് കോടതിയിലാണ് റിപ്പോർട്ട് നൽകിയതെന്നും റിപ്പോർട്ടിൽ പറയുന്നു.
2023 ഡിസംബറിൽ നവകേരള യാത്രയുടെ ഭാഗമായി മുഖ്യമന്ത്രിയും മന്ത്രിമാരും സഞ്ചരിച്ച ബസ് ആലപ്പുഴ ജനറൽ ആശുപത്രി ജംഗ്ഷൻ വഴി കടന്നുപോകുമ്പോൾ കരിങ്കൊടി കാട്ടി പ്രതിഷേധിച്ച യൂത്ത് കോൺഗ്രസ് നേതാക്കളായ എ.ഡി. തോമസിനെയും അജയ് ജുവൽ കുര്യാക്കോസിനെയും ഗൺമാൻമാരും സുരക്ഷാ ഉദ്യോഗസ്ഥരും ലാത്തി ഉപയോഗിച്ച് മർദിച്ചെന്നാണ് കേസ്. ആക്രമണത്തിൽ തോമസിന്റെ തലയ്ക്കും അജയ് ജുവലിന്റെ കൈയ്ക്കും ഗുരുതര പരിക്കേറ്റിരുന്നു.
സംഭവത്തിന്റെ ദൃശ്യങ്ങൾ സഹിതം പരാതി നൽകിയിട്ടും ആദ്യം കേസ് രജിസ്റ്റർ ചെയ്യാൻ പോലീസ് തയ്യാറായിരുന്നില്ല. പിന്നീട് ആലപ്പുഴ മജിസ്ട്രേറ്റ് കോടതിയുടെ ഇടപെടലിനെ തുടർന്നാണ് ഗൺമാൻമാർക്കെതിരെ കേസ് എടുത്തത്. പുനരന്വേഷണത്തിനായി രൂപീകരിച്ച എസ്ഐടി റിപ്പോർട്ടിന്റെ അടിസ്ഥാനത്തിലാണ് ഇപ്പോൾ നരഹത്യാശ്രമം ഉൾപ്പെടെയുള്ള ഗുരുതര വകുപ്പുകൾ ചുമത്തിയിരിക്കുന്നത്.
