വാഷിങ്ടൺ: ഇന്ത്യയും അമേരിക്കയും തമ്മിലുള്ള ഉഭയകക്ഷി വ്യാപാരക്കരാർ അന്തിമമാക്കുന്നതിന് ഇരുരാജ്യങ്ങളും അടുത്തെത്തിയെന്ന് യുഎസ് പ്രസിഡന്റ് ഡോണൾഡ് ട്രംപ്. കരാർ സംബന്ധിച്ച ചർച്ചകൾ പുരോഗമിക്കുകയാണെന്നും ഇരുരാജ്യങ്ങളും ധാരണയിലെത്തുമെന്ന പ്രതീക്ഷയുണ്ടെന്നും അദ്ദേഹം പറഞ്ഞു. നിലവിലുള്ള വ്യാപാരക്കരാറുകളിൽനിന്ന് വ്യത്യസ്തമായിരിക്കും ഇന്ത്യയുമായുള്ള കരാറെന്നും ട്രംപ് സൂചിപ്പിച്ചു.
ഇന്ത്യയും അമേരിക്കയും തമ്മിലുള്ള വ്യാപാരക്കരാർ അന്തിമമാക്കാൻ വളരെ കുറച്ച് വിഷയങ്ങൾ മാത്രമാണ് ഇനി പരിഹരിക്കാനുള്ളതെന്ന് യുഎസ് വിദേശകാര്യ സെക്രട്ടറി മാർക്കോ റൂബിയോയും വ്യക്തമാക്കി. കരാറിലെ ഏകദേശം 99 ശതമാനം ജോലികളും പൂർത്തിയായെന്നും ശേഷിക്കുന്ന വിഷയങ്ങൾ പ്രധാനമായും കരാറിലെ വാക്കുകളുടെയും വ്യവസ്ഥകളുടെയും വ്യാഖ്യാനവുമായി ബന്ധപ്പെട്ടതാണെന്നും അദ്ദേഹം ദി ഇന്ത്യൻ എക്സ്പ്രസിന് നൽകിയ അഭിമുഖത്തിൽ പറഞ്ഞു. ഏതാനും ആഴ്ചകൾക്കുള്ളിൽ കരാർ അന്തിമമാക്കാനാകുമെന്നാണ് പ്രതീക്ഷയെന്നും റൂബിയോ കൂട്ടിച്ചേർത്തു.
ഇന്ത്യൻ വിദേശകാര്യ മന്ത്രി എസ്. ജയശങ്കറും റൂബിയോയും മുംബൈയിൽ നടത്തിയ കൂടിക്കാഴ്ചയിൽ വ്യാപാരം, ഊർജസഹകരണം, പ്രതിരോധം, സാങ്കേതികവിദ്യ തുടങ്ങിയ വിഷയങ്ങൾ ചർച്ചയായി. അമേരിക്കയിൽനിന്നുള്ള ഊർജ ഉൽപ്പന്നങ്ങളുടെയും സാങ്കേതികവിദ്യകളുടെയും വാങ്ങൽ വർധിപ്പിക്കണമെന്നും റൂബിയോ ഇന്ത്യയോട് ആവശ്യപ്പെട്ടു.
2025 മുതൽ തുടരുന്ന ചർച്ചകളിൽ ഇറക്കുമതി തീരുവ, വിപണിയിലെ പ്രവേശനം, റഷ്യയിൽനിന്നുള്ള ഇന്ത്യയുടെ എണ്ണ ഇറക്കുമതി തുടങ്ങിയ വിഷയങ്ങൾ വെല്ലുവിളികളായി തുടരുകയായിരുന്നു. ഒക്ടോബർ 15-ന് കരാറിന്റെ ആദ്യഘട്ടം അന്തിമമാക്കിയെന്നും നിലവിൽ നിയമപരമായ കരട് തയ്യാറാക്കുന്ന നടപടികൾ പുരോഗമിക്കുകയാണെന്നും ഇന്ത്യയുടെ വാണിജ്യ സെക്രട്ടറി രാജേഷ് അഗർവാൾ അറിയിച്ചിരുന്നു.
