വാഷിങ്ടൺ: ഓപ്പൺഎഐയുടെ സാൻഫ്രാൻസിസ്കോ ഓഫീസിലെ രഹസ്യ യോഗമുറിയിൽ ശബ്ദം റെക്കോർഡ് ചെയ്യാനുള്ള ഉപകരണം സ്ഥാപിച്ചെന്ന കേസിൽ അറസ്റ്റിലായ മുൻ എൻജിനീയർ അബ്ദുൽറഹ്മാൻ അൽഫോസാൻ സൗദി രാജകുടുംബാംഗവുമായി നിരന്തരം ബന്ധപ്പെട്ടിരുന്നുവെന്ന് യുഎസ് പ്രോസിക്യൂട്ടർമാർ. സൗദി അറേബ്യയിൽ ആരംഭിക്കാനിരുന്ന നിർമിതബുദ്ധി (എഐ) പദ്ധതിയിൽ ചേരാൻ രാജകുടുംബാംഗം ഇയാളെ പ്രേരിപ്പിച്ചിരുന്നതായും കോടതിയിൽ സമർപ്പിച്ച രേഖകളിൽ പറയുന്നു. ആരോപണങ്ങൾ സംബന്ധിച്ച അന്വേഷണം തുടരുകയാണ്.
2025 ജൂലൈ മുതൽ ഓപ്പൺഎഐയിൽ എൻജിനീയറായി ജോലി ചെയ്തിരുന്ന അൽഫോസാൻ, കമ്പനിയുടെ എക്സിക്യൂട്ടീവ് യോഗങ്ങൾ നടന്നിരുന്ന മുറിയിൽ രഹസ്യമായി റെക്കോർഡിങ് ഉപകരണം സ്ഥാപിച്ചെന്നാണ് യുഎസ് അധികൃതരുടെ ആരോപണം. സെപ്റ്റംബർ 30-ന് ടെലിവിഷന്റെ പിൻഭാഗത്ത് യുഎസ്ബി പോർട്ടിൽ ഘടിപ്പിച്ച നിലയിൽ ഉപകരണം കണ്ടെത്തിയതായാണ് അന്വേഷണ ഉദ്യോഗസ്ഥർ പറയുന്നത്. ടോയ്‌ലറ്റ് പേപ്പറിൽ പൊതിഞ്ഞ നിലയിലായിരുന്നു ഉപകരണം. കമ്പനിയുടെ രഹസ്യ സാങ്കേതികവിദ്യകൾ, ഉൽപ്പന്ന പദ്ധതികൾ, വാണിജ്യ തന്ത്രങ്ങൾ, സർക്കാർ ഉദ്യോഗസ്ഥരുമായുള്ള കൂടിക്കാഴ്ചകൾ എന്നിവയുമായി ബന്ധപ്പെട്ട വിവരങ്ങൾ ചർച്ച ചെയ്തിരുന്ന മുറിയായിരുന്നു ഇത്.
റെക്കോർഡിങ് ഉപകരണം നിർമിക്കാനും പ്രവർത്തിപ്പിക്കാനും എൻക്രിപ്ഷൻ ഉൾപ്പെടെയുള്ള സാങ്കേതികവിദ്യകൾ ഉപയോഗിക്കാനും എഐ ചാറ്റ്ബോട്ട് അക്കൗണ്ടിലൂടെ നിർദേശങ്ങൾ തേടിയതായും പ്രോസിക്യൂട്ടർമാർ ആരോപിക്കുന്നു. സമാനമായ മറ്റൊരു ഉപകരണവും ഇയാളുടെ ബാഗിൽനിന്ന് കണ്ടെത്തിയതായി കോടതി രേഖകൾ വ്യക്തമാക്കുന്നു. എന്നാൽ, ഉപകരണം സ്ഥാപിച്ചത് അൽഫോസാൻ തന്നെയാണെന്ന കാര്യം കോടതിയിൽ തെളിയിക്കപ്പെട്ടിട്ടില്ല.
അറസ്റ്റിന് ദിവസങ്ങൾക്കുമുമ്പ് ഭാര്യയ്ക്കും കുഞ്ഞിനുമൊപ്പം സൗദി അറേബ്യയിലേക്ക് പോകാൻ ഇയാൾ ഏകദിശ വിമാനടിക്കറ്റ് ബുക്ക് ചെയ്തിരുന്നുവെന്നും പ്രോസിക്യൂട്ടർമാർ പറയുന്നു. അറസ്റ്റിനുശേഷം ഭാര്യയും കുഞ്ഞും സൗദിയിലേക്ക് പോയതായും യാത്രയ്ക്കുള്ള ടിക്കറ്റ് സൗദി സൈനിക ഉദ്യോഗസ്ഥൻ വാങ്ങിനൽകിയതായും ആരോപണമുണ്ട്. വിദേശത്തേക്കു കടക്കാൻ സാധ്യതയുണ്ടെന്ന പ്രോസിക്യൂഷന്റെ വാദം പരിഗണിച്ച് യുഎസ് ഫെഡറൽ കോടതി അൽഫോസാന് ജാമ്യം നിഷേധിച്ചു.
അതേസമയം, അൽഫോസാന്റെ അഭിഭാഷകൻ ആരോപണങ്ങൾ നിഷേധിക്കുകയും കേസ് നിയമപരമായി നേരിടുമെന്ന് വ്യക്തമാക്കുകയും ചെയ്തിട്ടുണ്ട്. രഹസ്യ വിവരങ്ങൾ ചോർത്തിയെന്നോ വിദേശ സർക്കാരിനുവേണ്ടി പ്രവർത്തിച്ചെന്നോ ഉള്ള ആരോപണങ്ങൾ ഇതുവരെ കോടതി സ്ഥിരീകരിച്ചിട്ടില്ല. കുറ്റം തെളിഞ്ഞാൽ അഞ്ചുവർഷം വരെ തടവും പിഴയും ലഭിക്കാവുന്ന കുറ്റമാണ് ഇയാൾക്കെതിരെ ചുമത്തിയിരിക്കുന്നത്.
