ന്യൂഡൽഹി: ആഗോള വ്യോമസേനാ കരുത്തിന്റെ പട്ടികയിൽ ചൈനയെയും പാകിസ്ഥാനെയും ബഹുദൂരം പിന്നിലാക്കി ഇന്ത്യൻ വ്യോമസേന ലോകത്തിൽ ആറാം സ്ഥാനത്തെത്തി. അന്താരാഷ്ട്ര തലത്തിൽ സൈനിക വിമാനങ്ങളെക്കുറിച്ച് പഠനം നടത്തുന്ന പ്രശസ്ത ഏജൻസിയായ ‘വേൾഡ് ഡയറക്ടറി ഓഫ് മോഡേൺ മിലിട്ടറി എയർക്രാഫ്റ്റ്’ (WDMMA) പുറത്തുവിട്ട 2026-ലെ ഗ്ലോബൽ എയർ പവേഴ്സ് റാങ്കിങ്ങിലാണ് ഇന്ത്യ ഈ ചരിത്ര നേട്ടം കൈവരിച്ചത്. വെറും വിമാനങ്ങളുടെ എണ്ണം മാത്രം നോക്കാതെ, വ്യോമസേനകളുടെ സാങ്കേതിക ആധുനികവത്കരണം, ലോജിസ്റ്റിക്സ് പിന്തുണ, ആക്രമണ-പ്രതിരോധ ശേഷികൾ, വ്യോമവ്യൂഹത്തിന്റെ വൈവിധ്യം എന്നിവ സൂക്ഷ്മമായി വിലയിരുത്തുന്ന ‘ട്രൂവാല്യൂ റേറ്റിങ്’ എന്ന പ്രത്യേക ഫോർമുല ഉപയോഗിച്ചാണ് ഈ റാങ്കിങ് തയ്യാറാക്കിയിരിക്കുന്നത്. ഈ വിലയിരുത്തലിൽ 69.4 എന്ന ഉയർന്ന ടിവിആർ സ്കോർ നേടിയാണ് ഇന്ത്യൻ വ്യോമസേന ആഗോളതലത്തിൽ ആറാം സ്ഥാനം ഉറപ്പിച്ചത്.
റാങ്കിങ്ങിൽ ഏറ്റവും ശ്രദ്ധേയമായത് അയൽരാജ്യവും വൻ സൈനിക ശക്തിയുമായ ചൈനയെ ഇന്ത്യ മറികടന്നു എന്നതാണ്. ചൈനയുടെ പീപ്പിൾസ് ലിബറേഷൻ ആർമി എയർഫോഴ്സ് (PLAAF) 63.8 സ്കോറോടെ ഇന്ത്യയ്ക്ക് തൊട്ടുപിന്നിൽ ഏഴാം സ്ഥാനത്താണ് എത്തിയത്. ചൈനയ്ക്ക് ഇന്ത്യയേക്കാൾ കൂടുതൽ വിമാനങ്ങൾ ഉണ്ടെങ്കിലും, അവരുടെ സേനയുടെ സന്തുലിതാവസ്ഥയും യുദ്ധസന്നദ്ധതയും ഇന്ത്യൻ വ്യോമസേനയേക്കാൾ പിന്നിലാണെന്നാണ് റിപ്പോർട്ട് വ്യക്തമാക്കുന്നത്. ഇന്ത്യയുടെ പക്കലുള്ള റഫാൽ, സുഖോയ്-30 എംകെഐ, തദ്ദേശീയമായി നിർമ്മിച്ച തേജസ് എന്നീ യുദ്ധവിമാനങ്ങളുടെ കരുത്തും മികച്ച പ്രതിരോധ മിസൈൽ സംവിധാനങ്ങളുമാണ് ഈ നേട്ടത്തിന് പിന്നിൽ. അതേസമയം, പ്രതിരോധ രംഗത്ത് ഇന്ത്യയുമായി നിരന്തരം മത്സരിക്കുന്ന പാകിസ്ഥാൻ വ്യോമസേന (PAF) ഈ പട്ടികയിൽ വളരെ പിന്നിലാണ്. 46.3 സ്കോറോടെ 18-ാം സ്ഥാനത്താണ് പാകിസ്ഥാൻ ഇടംപിടിച്ചത്.
ആഗോള റാങ്കിങ്ങിൽ ആദ്യ അഞ്ച് സ്ഥാനങ്ങളും കൈക്കലാക്കിയത് അമേരിക്കയും റഷ്യയുമാണ്. അമേരിക്കയുടെ വിവിധ സൈനിക വിഭാഗങ്ങളുടെ വ്യോമശക്തിയെ വെവ്വേറെയാണ് ഈ പട്ടികയിൽ ഉൾപ്പെടുത്തിയിരിക്കുന്നത്. 242.9 എന്ന അസാധ്യ സ്കോറോടെ യുഎസ് എയർഫോഴ്സ് ഒന്നാം സ്ഥാനത്തും, യുഎസ് നേവി രണ്ടാം സ്ഥാനത്തും തുടരുന്നു. തൊട്ടുപിന്നിൽ മൂന്നാമതായി റഷ്യൻ എയർഫോഴ്സും നാലും അഞ്ചും സ്ഥാനങ്ങളിൽ യഥാക്രമം യുഎസ് ആർമിയും യുഎസ് മറൈൻ കോർപ്സും ഇടംപിടിച്ചു. അമേരിക്കയുടെ വിഭജിക്കപ്പെട്ട സേനാ വിഭാഗങ്ങളെ ഒരുമിച്ച് കൂട്ടുകയാണെങ്കിൽ ലോകത്തിലെ ഏറ്റവും ശക്തമായ മൂന്നാമത്തെ വ്യോമസേനാ ശക്തിയായി മാറുന്നത് ഇന്ത്യയാണ്. ജപ്പാൻ, ഇസ്രായേൽ, ഫ്രാൻസ്, ബ്രിട്ടൻ തുടങ്ങിയ പ്രമുഖ ലോകശക്തികളെല്ലാം വ്യോമക്കരുത്തിൽ ഇന്ത്യയ്ക്ക് പിന്നിലാണ്. നിലവിൽ 1,700-ലധികം വിമാനങ്ങളുള്ള ഇന്ത്യൻ വ്യോമസേന, വരും വർഷങ്ങളിൽ തദ്ദേശീയമായ അഞ്ചാം തലമുറ യുദ്ധവിമാന പദ്ധതികളിലൂടെ തങ്ങളുടെ കരുത്ത് ഇനിയും വർദ്ധിപ്പിക്കാനുള്ള തയ്യാറെടുപ്പിലാണ്.
