സിഡ്‌നി: ഓസ്ട്രേലിയയുടെ 2026-ലെ പ്രധാനമന്ത്രിയുടെ സ്പെല്ലിങ് ബീ (Prime Minister’s Spelling Bee) മത്സരത്തിൽ ദേശീയ ചാമ്പ്യൻ പട്ടം നേടി ഇന്ത്യക്കാരിയായ അഞ്ചാം ക്ലാസ് വിദ്യാർത്ഥിനി ആരിക. ന്യൂ സൗത്ത് വെയിൽസിലെ ഹോൾസ്വർത്തി പബ്ലിക് സ്കൂളിലെ (Holsworthy Public School) അഞ്ചാം ക്ലാസ് വിദ്യാർത്ഥിനിയായ ആരിക, അഞ്ചാം–ആറാം ക്ലാസ് വിഭാഗമായ ഓറഞ്ച് ലെവലിലാണ് ദേശീയ വിജയിയായി തിരഞ്ഞെടുക്കപ്പെട്ടത്. ഓസ്ട്രേലിയയുടെ വിവിധ ഭാഗങ്ങളിൽ നിന്നുള്ള വിദ്യാർത്ഥികൾ പങ്കെടുത്ത കടുത്ത മത്സരത്തിൽ ഒരു മിനിറ്റും നാല് സെക്കൻഡും കൊണ്ട് നൽകിയ 30 വാക്കുകളിൽ 29 എണ്ണവും കൃത്യമായി സ്പെല്ലിങ് പറഞ്ഞാണ് ആരിക ഈ ശ്രദ്ധേയമായ നേട്ടം സ്വന്തമാക്കിയത്.
ദേശീയ ചാമ്പ്യനായ ആരികയ്ക്ക് നിരവധി സമ്മാനങ്ങളാണ് ലഭിക്കുന്നത്. പ്രധാനമന്ത്രിയെ നേരിൽ കാണാനും ദേശീയ വിജയിയുടെ പുരസ്കാരവും ട്രോഫിയും ഏറ്റുവാങ്ങാനുമായി കാൻബറയിലേക്ക് യാത്ര ചെയ്യാനുള്ള അവസരത്തിനൊപ്പം ഒരു ഐപാഡും 250 ഡോളറിന്റെ ഹാർപ്പർകോളിൻസ് പുസ്തക പാക്കും സമ്മാനമായി ലഭിക്കും. കൂടാതെ, ആരിക പഠിക്കുന്ന ഹോൾസ്വർത്തി പബ്ലിക് സ്കൂളിന് സ്കൂൾ സമൂഹത്തിന്റെ വികസനത്തിനായി 1,000 ഡോളറിന്റെ വൗച്ചറും ലഭിക്കും. വായനയോട് വലിയ താൽപര്യവും ഭാഷയോട് പ്രത്യേക ഇഷ്ടവുമുള്ള വിദ്യാർത്ഥിനിയായ ആരികയുടെ വിജയം, പഠനത്തോടുള്ള കൗതുകവും വാക്കുകളോടുള്ള സ്നേഹവും ഒരാളെ എത്ര വലിയ നേട്ടങ്ങളിലേക്ക് എത്തിക്കുമെന്നതിന്റെ മികച്ച ഉദാഹരണമായി മാറിയിരിക്കുകയാണ്.
