ടെഹ്റാൻ: അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കേറ്റ തിരിച്ചടിക്കു പിന്നാലെ അമേരിക്കൻ നയങ്ങളിൽ മാറ്റമുണ്ടാകുമെന്ന് പ്രതീക്ഷിക്കുന്നത് വലിയ തെറ്റിദ്ധാരണയാണെന്ന് ഇറാൻ പരമോന്നത നേതാവ് മുജ്തബ ഖമനയി. അമേരിക്കയിൽ അധികാരത്തിലുള്ള പാർട്ടികൾ മാറിയാലും ഇറാനോടുള്ള വാഷിങ്ടണിന്റെ ശത്രുതയ്ക്ക് മാറ്റമുണ്ടാകില്ലെന്ന് അദ്ദേഹം മുന്നറിയിപ്പ് നൽകി. അമേരിക്ക വീണ്ടും ഇറാനെ ആക്രമിച്ചാൽ യുദ്ധത്തിന്റെ വ്യാപ്തി കൂടുതൽ വർധിക്കുമെന്നും അദ്ദേഹം വ്യക്തമാക്കി.
നവംബർ നാലിന് ഇറാന്റെ ഔദ്യോഗിക വെബ്സൈറ്റിൽ പ്രസിദ്ധീകരിച്ച പ്രസ്താവനയിലാണ് മുജ്തബ ഖമനയി നിലപാട് വ്യക്തമാക്കിയത്. അമേരിക്കൻ രാഷ്ട്രീയത്തിലെ കക്ഷിമാറ്റങ്ങളിലൂടെ ഇറാനോടുള്ള സമീപനം മാറുമെന്നോ അമേരിക്കയ്ക്ക് വിട്ടുവീഴ്ചകൾ നൽകിയാൽ ശത്രുത അവസാനിക്കുമെന്നോ കരുതുന്നവർ വലിയ തെറ്റാണ് ചെയ്യുന്നതെന്ന് അദ്ദേഹം പറഞ്ഞു.
അമേരിക്കയുമായുള്ള ഏറ്റുമുട്ടലിൽ ഇറാൻ നേടിയ നേട്ടങ്ങൾ അദ്ദേഹം പ്രസ്താവനയിൽ എടുത്തുപറഞ്ഞു. പശ്ചിമേഷ്യയിലെ അമേരിക്കൻ സൈനിക താവളങ്ങൾ തകർത്തതും ഹോർമുസ് കടലിടുക്കിന്റെ നിയന്ത്രണവും അമേരിക്കൻ ആധിപത്യത്തിനെതിരായ പോരാട്ടത്തിന്റെ ഭാഗമാണെന്ന് അദ്ദേഹം അവകാശപ്പെട്ടു. അമേരിക്കയുടെ ആഗോള ആധിപത്യത്തിന്റെ അന്ത്യത്തെ ഇറാൻ അടുത്തായാണ് കാണുന്നതെന്നും അദ്ദേഹം കൂട്ടിച്ചേർത്തു.
അമേരിക്കയുടെ ഭാഗത്തുനിന്ന് വീണ്ടും ആക്രമണമുണ്ടായാൽ അതിനുള്ള ഇറാന്റെ മറുപടി കൂടുതൽ ശക്തവും വിപുലവുമായിരിക്കുമെന്നും മുന്നറിയിപ്പുണ്ട്. യുദ്ധത്തിന്റെ വ്യാപ്തി കൂടുതൽ പ്രദേശങ്ങളിലേക്ക് വ്യാപിക്കാമെന്നും അദ്ദേഹം വ്യക്തമാക്കി.
അതേസമയം, അമേരിക്കൻ തിരഞ്ഞെടുപ്പിൽ ഡെമോക്രാറ്റുകൾ നേടിയ വിജയത്തെ ഇറാനിലെ മറ്റു നേതാക്കൾ സ്വാഗതം ചെയ്തു. അമേരിക്കൻ ജനത യുദ്ധത്തിനെതിരേ വിധിയെഴുതിയെന്നാണ് ഇറാൻ പാർലമെന്റ് സ്പീക്കറും അമേരിക്കയുമായുള്ള ചർച്ചകളിലെ പ്രധാന മധ്യസ്ഥനുമായ മുഹമ്മദ് ബാഘർ ഖാലിബാഫ് പ്രതികരിച്ചത്. യുദ്ധത്തിന്റെ സാമ്പത്തിക പ്രത്യാഘാതങ്ങളിൽ ജനങ്ങൾ അതൃപ്തരാണെന്നും അദ്ദേഹം ചൂണ്ടിക്കാട്ടി.
1979ൽ ടെഹ്റാനിലെ അമേരിക്കൻ എംബസി പിടിച്ചെടുത്തതിന്റെ വാർഷികദിനമായ നവംബർ നാലിനാണ് ഇറാനിൽ ദേശീയ ദിനാചരണത്തിന്റെ ഭാഗമായി അമേരിക്കൻ വിരുദ്ധ റാലികൾ നടന്നത്. ഇതേ ദിവസമാണ് മുജ്തബ ഖമനയിയുടെ പ്രസ്താവനയും പുറത്തുവന്നത്.
അമേരിക്കയും ഇസ്രയേലും ഫെബ്രുവരിയിൽ ഇറാനെതിരേ ആരംഭിച്ച യുദ്ധം പശ്ചിമേഷ്യയിലെ സംഘർഷം രൂക്ഷമാക്കിയിരുന്നു. യുദ്ധം, ഇന്ധനവില വർധന, ജീവിതച്ചെലവ് എന്നിവ അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് തിരിച്ചടിയായ ഘടകങ്ങളായി വിലയിരുത്തപ്പെടുന്നു.
