കൊച്ചി: ഇന്ത്യൻ സൂപ്പർ ലീഗ് (ഐഎസ്എൽ) 2026–27 സീസണിൽ കേരള ബ്ലാസ്റ്റേഴ്സ് എഫ്‌സിയുടെ ആദ്യ ഹോം മത്സരം ഇന്ന്. രാത്രി 7.30ന് കൊച്ചി കലൂർ ജവഹർലാൽ നെഹ്‌റു സ്റ്റേഡിയത്തിൽ മുംബൈ സിറ്റി എഫ്‌സിയെ ബ്ലാസ്റ്റേഴ്സ് നേരിടും.
സീസണിലെ ആദ്യ രണ്ടു മത്സരങ്ങളിൽ ഒരു ജയവും ഒരു തോൽവിയുമാണ് ബ്ലാസ്റ്റേഴ്സിന്റെ സമ്പാദ്യം. ഇന്റർ കാശിയെ എതിരില്ലാത്ത രണ്ടു ഗോളുകൾക്ക് തോൽപ്പിച്ചാണ് ടീം സീസൺ തുടങ്ങിയത്. എന്നാൽ കഴിഞ്ഞ മത്സരത്തിൽ നോർത്ത് ഈസ്റ്റ് യുണൈറ്റഡ് എഫ്‌സിയോട് 4–1ന് പരാജയപ്പെട്ടു. സ്വന്തം മൈതാനത്ത് ആരാധകരുടെ പിന്തുണയിൽ തിരിച്ചുവരവാണ് ബ്ലാസ്റ്റേഴ്സ് ലക്ഷ്യമിടുന്നത്.
മുംബൈ സിറ്റിക്കും സീസണിൽ ഇതുവരെ വിജയം നേടാനായിട്ടില്ല. രണ്ടു മത്സരങ്ങളിൽ ഒരു സമനിലയും ഒരു തോൽവിയുമാണ് ടീമിന്റെ നേട്ടം. ആക്രമണനിരയുടെ പ്രകടനം മെച്ചപ്പെടുത്തി ആദ്യ വിജയം സ്വന്തമാക്കാനാണ് മുംബൈയുടെ ശ്രമം.
അൽ ഫുർസാൻ സ്പോർട്സ് ഇൻവെസ്റ്റ്മെന്റ് ബ്ലാസ്റ്റേഴ്സ് ക്ലബ്ബിനെ ഏറ്റെടുത്തശേഷമുള്ള കൊച്ചിയിലെ ആദ്യ മത്സരമാണിത്. സ്റ്റേഡിയം വാടകയെച്ചൊല്ലി ഉടമകളായ ഗ്രേറ്റർ കൊച്ചിൻ ഡെവലപ്‌മെന്റ് അതോറിറ്റിയും (ജിസിഡിഎ) ബ്ലാസ്റ്റേഴ്സ് മാനേജ്‌മെന്റും തമ്മിലുണ്ടായ തർക്കം പരിഹരിച്ചതോടെയാണ് മത്സരത്തിന് വഴിയൊരുങ്ങിയത്.
മത്സരം സോണി സ്പോർട്സ് നെറ്റ്‌വർക്കിൽ തത്സമയം സംപ്രേഷണം ചെയ്യും. ഓൺലൈൻ സ്ട്രീമിങ്ങിനുള്ള സംവിധാനങ്ങളും ലഭ്യമാണ്.
