അഡ്ലയ്ഡ്: ഇംഗ്ലണ്ട് പേസ് ബൗളർ മാർക്ക് വുഡ് രാജ്യാന്തര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചു. 36-കാരനായ വുഡ് 11 വർഷത്തെ രാജ്യാന്തര കരിയറിനാണ് വിരാമമിട്ടത്. തുടർച്ചയായ പരിക്കുകളും ചികിത്സാ നിർദേശങ്ങളും കണക്കിലെടുത്താണ് ടെസ്റ്റിലും ഏകദിനത്തിലും ഇനി തുടരാനാകില്ലെന്ന തീരുമാനത്തിലേക്ക് താരം എത്തിയത്.
2015ൽ ന്യൂസിലൻഡിനെതിരായ മത്സരത്തിലൂടെയാണ് വുഡ് ഇംഗ്ലണ്ട് ടീമിൽ അരങ്ങേറ്റം കുറിച്ചത്. 38 ടെസ്റ്റുകളിൽനിന്ന് 119 വിക്കറ്റും 70 ഏകദിനങ്ങളിൽനിന്ന് 80 വിക്കറ്റും 38 ട്വന്റി20 രാജ്യാന്തര മത്സരങ്ങളിൽനിന്ന് 54 വിക്കറ്റും താരം സ്വന്തമാക്കി. മൂന്ന് ഫോർമാറ്റുകളിലുമായി 146 മത്സരങ്ങളാണ് വുഡ് ഇംഗ്ലണ്ടിനായി കളിച്ചത്.
2019ലെ ഏകദിന ലോകകപ്പ് നേടിയ ഇംഗ്ലണ്ട് ടീമിൽ നിർണായക അംഗമായിരുന്ന വുഡ് ടൂർണമെന്റിൽ 18 വിക്കറ്റുകൾ വീഴ്ത്തി. 2022ലെ ട്വന്റി20 ലോകകപ്പ് നേടിയ ഇംഗ്ലണ്ട് ടീമിലും അദ്ദേഹം അംഗമായിരുന്നു. ആ ടൂർണമെന്റിൽ നാല് മത്സരങ്ങളിൽനിന്ന് ഒമ്പത് വിക്കറ്റുകൾ നേടി.
കരിയറിലുടനീളം പരിക്കുകൾ വുഡിന് വലിയ വെല്ലുവിളിയായിരുന്നു. കൈമുട്ട്, കാൽമുട്ട് തുടങ്ങിയവയുമായി ബന്ധപ്പെട്ട പരിക്കുകൾ കാരണം പലപ്പോഴും മത്സരങ്ങളിൽനിന്ന് വിട്ടുനിൽക്കേണ്ടിവന്നു. 2025-26 ആഷസ് പരമ്പരയിലെ പെർത്ത് ടെസ്റ്റിലാണ് വുഡ് അവസാനമായി ഇംഗ്ലണ്ടിനായി കളിച്ചത്. മത്സരത്തിനിടെ ഇടത് കാൽമുട്ടിലെ പരിക്ക് വീണ്ടും വഷളായതിനെ തുടർന്ന് പിന്നീട് ടീമിൽ തിരിച്ചെത്താനായില്ല.
ഇംഗ്ലണ്ടിനായി കളിക്കാൻ കഴിഞ്ഞത് വലിയ ബഹുമതിയും സ്വപ്നസാക്ഷാത്കാരവുമാണെന്ന് വിരമിക്കൽ പ്രഖ്യാപനത്തിൽ വുഡ് വ്യക്തമാക്കി. ഭാവിയിൽ ക്രിക്കറ്റുമായി ഏതെങ്കിലും തരത്തിൽ ബന്ധപ്പെട്ട് തുടരാനുള്ള ആഗ്രഹവും താരം പ്രകടിപ്പിച്ചിട്ടുണ്ട്.
