തിരുവനന്തപുരം: തെറ്റുകളും പിഴവുകളും മറച്ചുവെക്കാതെ, പൂർണ്ണ ഉത്തരവാദിത്തത്തോടും സുതാര്യതയോടും കൂടി പ്രവർത്തിക്കുന്ന ഒരു തൊഴിൽ സംസ്കാരം വളർത്തിയെടുക്കാൻ യുവ ഡോക്ടർമാർ സന്നദ്ധരാകണമെന്ന് ആരോഗ്യ-ദേവസ്വം വകുപ്പ് മന്ത്രി കെ. മുരളീധരൻ ആഹ്വാനം ചെയ്തു. തിരുവനന്തപുരം ഗവൺമെന്റ് മെഡിക്കൽ കോളേജിലെ 2020 എം.ബി.ബി.എസ് ബാച്ചിന്റെ ബിരുദദാന ചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഭാവിയിൽ എത്രമാത്രം സത്യസന്ധതയോടെ കർത്തവ്യങ്ങൾ നിർവ്വഹിച്ചാലും ചില ഘട്ടങ്ങളിൽ വിമർശനങ്ങൾ നേരിടേണ്ടി വന്നേക്കാമെന്ന് മന്ത്രി ഓർമ്മിപ്പിച്ചു. പരിമിതികൾക്കിടയിലും സാധാരണക്കാരായ ജനങ്ങൾ വലിയ തോതിൽ ആശ്രയിക്കുന്നത് സർക്കാർ സംവിധാനങ്ങളെയാണ്. അതിനാൽ, പാവപ്പെട്ട രോഗികളുടെ പ്രധാന ആശ്വാസകേന്ദ്രങ്ങളായ സർക്കാർ ആശുപത്രികളിൽ സേവനം അനുഷ്ഠിക്കാൻ ബിരുദം നേടി പുറത്തിറങ്ങുന്ന ഡോക്ടർമാർ കൂടുതൽ താല്പര്യത്തോടെ മുന്നോട്ടുവരണം. പൊതുജനാരോഗ്യ സംവിധാനങ്ങളുടെ മഹത്വം നിലനിർത്തേണ്ടത് മേഖലയിൽ പ്രവർത്തിക്കുന്ന ഓരോരുത്തരുടെയും കടമയാണെന്നും അദ്ദേഹം പറഞ്ഞു.
രോഗികളോട് ശാന്തതയോടും ആശ്വാസം പകരുന്ന രീതിയിലും ഇടപെടുക എന്നത് ഒരു ഡോക്ടറുടെ സുപ്രധാന ചുമതലയാണെന്ന് മന്ത്രി ചൂണ്ടിക്കാട്ടി. കോവിഡ് മഹാമാരി സൃഷ്ടിച്ച സങ്കീർണ്ണമായ വെല്ലുവിളികളെയും പ്രതിസന്ധികളെയും അതിജീവിച്ചുകൊണ്ട് പഠനം വിജയകരമായി പൂർത്തിയാക്കിയ 2020 ബാച്ചിലെ വിദ്യാർത്ഥികളെ അദ്ദേഹം പ്രത്യേകം അഭിനന്ദിച്ചു.
ചടങ്ങിൽ 236 വിദ്യാർത്ഥികൾക്ക് ബിരുദങ്ങളും വിവിധ പുരസ്കാരങ്ങളും സമ്മാനിച്ചു. ചലച്ചിത്ര താരവും സാമൂഹിക പ്രവർത്തകനുമായ പ്രകാശ് രാജ്, മെഡിക്കൽ കോളേജ് പ്രിൻസിപ്പൽ ഡോ. രഞ്ചു രവീന്ദ്രൻ, മെഡിക്കൽ വിദ്യാഭ്യാസ ഡയറക്ടർ ഡോ. വിശ്വനാഥൻ കെ. വി, മുൻ ചീഫ് സെക്രട്ടറി ഡോ. എ. ജയതിലക് എന്നിവർ ചടങ്ങിൽ പങ്കെടുത്തു
