മെൽബൺ: ഓസ്ട്രേലിയയിലും ന്യൂസിലൻഡിലും മുരിങ്ങ ഉൽപ്പന്നങ്ങൾ ഭക്ഷണമായി വിൽക്കാൻ അനുമതി തേടിയുള്ള അപേക്ഷ തള്ളി. ‘ഫുഡ് സ്റ്റാൻഡേർഡ്സ് ഓസ്ട്രേലിയ ന്യൂസിലൻഡ്’ ആണ് മുരിങ്ങയെ ഒരു ‘നോവൽ ഫുഡ്’ (അതായത് ഈ രാജ്യങ്ങളിൽ പരമ്പരാഗതമായി ഉപയോഗിച്ചുപോന്ന ചരിത്രമില്ലാത്ത ഭക്ഷണം) ആയി തരംതിരിക്കാനുള്ള അപേക്ഷ നിരസിച്ചത്. ഇതോടെ മുരിങ്ങയില (പച്ചയും ഉണങ്ങിയതും), മുരിങ്ങക്കായ, മുരിങ്ങക്കുരുവിൽ നിന്നുള്ള എണ്ണ എന്നിവ നേരിട്ടോ അല്ലെങ്കിൽ മറ്റ് ഭക്ഷണങ്ങളിൽ ചേരുവയായി ചേർത്തോ റീട്ടെയിൽ വിപണിയിൽ വിൽക്കാൻ അനുമതിയുണ്ടാകില്ല.
മുരിങ്ങ ഉൽപ്പന്നങ്ങൾ ഇറക്കുമതി ചെയ്യുന്ന വ്യാപാരികൾക്കും ബ്രോക്കർമാർക്കും ഓസ്ട്രേലിയൻ കാർഷിക-പരിസ്ഥിതി മന്ത്രാലയം ഇത് സംബന്ധിച്ച കർശന ജാഗ്രതാ നിർദ്ദേശം നൽകിയിട്ടുണ്ട്. ഇതനുസരിച്ച് ‘ഇംപോ ർട്ടഡ് ഫുഡ് ഇൻസ്പെക്ഷൻ സ്കീമിന്റെ’ കീഴിൽ അതിർത്തിയിൽ എത്തുന്ന മുരിങ്ങയുടെ എല്ലാ ഇറക്കു മതികളും പരാജയപ്പെടും. ഇങ്ങനെ തടയപ്പെടുന്ന ഉൽപ്പന്നങ്ങൾ സ്വന്തം ചെലവിൽ നശിപ്പിച്ചു കളയുകയോ അല്ലെങ്കിൽ തിരികെ കയറ്റി അയക്കുകയോ ചെയ്യേണ്ടി വരും.
മുരിങ്ങയുടെ സുരക്ഷിതത്വം വിലയിരുത്തിയ FSANZ, ഇതിന്റെ ഉപയോഗം വഴി ഉണ്ടായേക്കാവുന്ന ചില സുരക്ഷാ ആശങ്കകൾ കണ്ടെത്തുകയും, എന്നാൽ ഇത് പൂർണ്ണമായി വിലയിരുത്താൻ തക്ക വിശ്വസനീയമായ ശാസ്ത്രീയ വിവരങ്ങൾ ലഭ്യമായിട്ടില്ലെന്ന് വ്യക്തമാക്കുകയും ചെയ്തു. ഡാറ്റ അപൂർണ്ണമായതിനാൽ മുരിങ്ങയുടെ ആരോഗ്യപരമായ സുരക്ഷിതത്വം സ്ഥിരീകരിക്കാൻ കഴിയില്ലെന്നാണ് ഔദ്യോഗിക വിശദീകരണം. ഒരു പുതിയ ഭക്ഷ്യവസ്തുവിന് അനുമതി തേടുമ്പോൾ ഉയർന്ന നിലവാരമുള്ള ശാസ്ത്രീയ തെളിവുകൾ ആവശ്യമാണെന്ന് ഈ തീരുമാനം അടിവരയിടുന്നു.
ഓസ്ട്രേലിയ ന്യൂസിലൻഡ് ഫുഡ് സ്റ്റാൻഡേർഡ്സ് കോഡിന്റെ ‘ഷെഡ്യൂൾ 25 – സെക്ഷൻ 2’ പ്രകാരം അംഗീകരിക്കപ്പെട്ട നോവൽ ഫുഡുകളുടെ പട്ടികയിൽ മുരിങ്ങ ഉൾപ്പെടാത്തതിനാലാണ് ഈ കടുത്ത നടപടി. കൂടുതൽ വിവരങ്ങൾ FSANZ-ന്റെ വെബ്സൈറ്റിലെ ‘A1294 Rejection Report’-ൽ ലഭ്യമാണ്. വ്യാപാരികൾ ഇറക്കുമതി ചെയ്യുന്നതിന് മുൻപ് ഓസ്ട്രേലിയൻ ബയോസെക്യൂരിറ്റി ഇംപോർട്ട് കണ്ടീഷൻസ് സിസ്റ്റം (BICON) പരിശോധിച്ച് നിയമങ്ങൾ ഉറപ്പുവരുത്തേണ്ടതാണെന്നും അധികൃതർ അറിയിച്ചു.
