ക്യാന്ബറ: രാജ്യത്ത് നിലനില്ക്കുന്ന ഇന്ധന പ്രതിസന്ധിക്ക് പരിഹാരം കാണാന് നിര്ണ്ണായക നീക്കവുമായി ഓസ്ട്രേലിയന് പ്രധാനമന്ത്രി ആന്തണി ആല്ബനീസ്. വിവിധ ഏഷ്യന് രാജ്യങ്ങളിലെ ഭരണാധികാരികളുമായി അദ്ദേഹം നടത്തുന്ന ചര്ച്ചകള് ഓസ്ട്രേലിയക്ക് വലിയ നേട്ടമാകുന്നു.ബ്രൂണെ, ദക്ഷിണ കൊറിയ എന്നീ രാജ്യങ്ങളില് നിന്ന് 100 ദശലക്ഷം ലിറ്റര് ഡീസല് കൂടി അധികമായി ലഭ്യമാക്കുമെന്ന് പ്രധാനമന്ത്രി അറിയിച്ചു.
ഹോര്മുസ് കടലിടുക്കിലെ ഉപരോധവും ആഗോള വിപണിയിലെ അനിശ്ചിതത്വവും മൂലം ഓസ്ട്രേലിയന് ഇന്ധന വിപണി കടുത്ത സമ്മര്ദ്ദത്തിലായിരുന്നു. ഈ സാഹചര്യത്തിലാണ് പ്രധാനമന്ത്രി നേരിട്ട് ഇടപെട്ട് ഏഷ്യന് രാഷ്ട്രത്തലവന്മാരുമായി ഉഭയകക്ഷി ചര്ച്ചകള് നടത്തിയത്. വരും മാസങ്ങളില് രാജ്യത്തെ വ്യാവസായിക-ഗതാഗത മേഖലകളിലെ ഇന്ധന ലഭ്യത ഉറപ്പാക്കാന് ഈ അധിക വിഹിതം വലിയ തോതില് സഹായിക്കും.
ഊര്ജ്ജ മേഖലയിലെ സഹകരണം കൂടുതല് ശക്തമാക്കുന്നതിനെക്കുറിച്ച് പ്രധാനമന്ത്രി ബന്ധപ്പെട്ട രാജ്യങ്ങളുമായി സംസാരിച്ചു. രാജ്യാന്തര വിപണിയിലെ വ്യതിയാനങ്ങളും വിതരണ ശൃംഖലയിലെ തടസ്സങ്ങളും പരിഹരിക്കുന്നതിനായി കൂടുതല് രാജ്യങ്ങളില് നിന്ന് ഇന്ധനം ഇറക്കുമതി ചെയ്യുന്നതിനുള്ള സാധ്യതകള് ഫെഡറല് സര്ക്കാര് സജീവമായി പരിശോധിച്ചുവരികയാണ്. ജീലോങ് എണ്ണശുദ്ധീകരണ ശാലയിലുണ്ടായ തീപിടുത്തം ആഭ്യന്തര ഉത്പാദനത്തെ ബാധിച്ച സാഹചര്യത്തില്, പ്രധാനമന്ത്രിയുടെ ഈ നയതന്ത്ര ഇടപെടല് ഓസ്ട്രേലിയന് ഇന്ധന വിപണിക്ക് വലിയ ആശ്വാസമാകുമെന്നാണ് വിലയിരുത്തപ്പെടുന്നത്.
