പാലക്കാട്: പാലക്കാട് റെയിൽവേ ഡിവിഷനിൽ നിന്ന് തന്ത്രപ്രധാനമായ മംഗളൂരുവിനെ വേർപെടുത്തി മൈസൂരു ഡിവിഷന്റെ ഭാഗമാക്കാനുള്ള കേന്ദ്ര സർക്കാർ നീക്കത്തിനെതിരെ ശക്തമായ പ്രതിഷേധവുമായി യു.ഡി.എഫ് രംഗത്തെത്തി. കർണാടക തിരഞ്ഞെടുപ്പ് ലക്ഷ്യം വെച്ചുകൊണ്ട് ബി.ജെ.പി നടത്തുന്ന രാഷ്ട്രീയ നീക്കമാണിതെന്ന് എം.പിമാരായ രാജ്മോഹൻ ഉണ്ണിത്താനും വി.കെ. ശ്രീകണ്ഠനും ആരോപിച്ചു. കേന്ദ്ര സർക്കാരിന്റെയും റെയിൽവേ ബോർഡിന്റെയും ഈ ഏകപക്ഷീയ നടപടിക്കെതിരെ പ്രത്യക്ഷ സമരപരിപാടികളിലേക്ക് കടക്കാനാണ് യു.ഡി.എഫിന്റെ തീരുമാനം.
തീരുമാനം ഉടനടി പിൻവലിക്കണമെന്ന് ആവശ്യപ്പെട്ട് വരാനിരിക്കുന്ന തിരുവോണ ദിവസം പാലക്കാട് റെയിൽവേ ആസ്ഥാനത്ത് യു.ഡി.എഫ് ജനപ്രതിനിധികളുടെ നേതൃത്വത്തിൽ ഉപവാസ സമരം സംഘടിപ്പിക്കും. കേരളത്തിന്റെ റെയിൽവേ വികസനത്തിന് കനത്ത തിരിച്ചടിയാകുന്ന ഇത്തരം നടപടികൾ യാതൊരു കാരണവശാലും അംഗീകരിക്കാനാകില്ലെന്ന് എം.പിമാർ വ്യക്തമാക്കി. ദക്ഷിണേന്ത്യയിൽ തന്നെ ഏറ്റവും കൂടുതൽ വരുമാനമുള്ള ഡിവിഷനുകളിലൊന്നിനെ വിഭജിക്കുന്നതിലൂടെ ജനങ്ങളെ കബളിപ്പിക്കാനാണ് അധികൃതർ ശ്രമിക്കുന്നത്.
ഏറ്റവും കൂടുതൽ വരുമാനം നേടിത്തരുന്ന മംഗളൂരുവിനെ അടർത്തിയെടുക്കുന്നതോടെ ഏകദേശം 1200 കോടി രൂപയുടെ ഭീമമായ വരുമാന നഷ്ടമാണ് പാലക്കാട് ഡിവിഷന് ഉണ്ടാകുകയെന്ന് കണക്കാക്കപ്പെടുന്നു. റെയിൽവേ മന്ത്രി പോലുമറിയാതെയാണ് ഇത്തരമൊരു സുപ്രധാന തീരുമാനം കൈക്കൊണ്ടതെന്ന വാദം പച്ചക്കള്ളമാണെന്നും, ഇത് കേരളത്തോടുള്ള പരസ്യമായ വെല്ലുവിളിയാണെന്നും നേതാക്കൾ ചൂണ്ടിക്കാട്ടി. വിഭജന നീക്കം പൂർണ്ണമായും പിൻവലിക്കുന്നതുവരെ എല്ലാവരെയും അണിനിരത്തി ശക്തമായ ജനകീയ പ്രക്ഷോഭങ്ങൾക്ക് നേതൃത്വം നൽകാനാണ് മുന്നണിയുടെ തീരുമാനം.
