ബംഗളൂരു: കെ. ജമുനാ റാണി അന്തരിച്ചു. 88 വയസ്സായിരുന്നു. വാർധക്യസഹജമായ അസുഖങ്ങളെ തുടർന്ന് വ്യാഴാഴ്ച ബെംഗളൂരുവിലെ വസതിയിലായിരുന്നു അന്ത്യം.
1938 മേയ് 17-ന് ആന്ധ്രപ്രദേശിൽ ജനിച്ച ജമുനാ റാണി ബാലതാരമായാണ് സംഗീതരംഗത്തേക്ക് എത്തിയത്. പിന്നീട് തമിഴ്, തെലുങ്ക്, മലയാളം, കന്നഡ, സിംഹള ഭാഷകളിലായി 6,000-ത്തിലധികം ഗാനങ്ങൾ ആലപിച്ച് ദക്ഷിണേന്ത്യൻ ചലച്ചിത്രസംഗീതത്തിലെ ശ്രദ്ധേയ ശബ്ദങ്ങളിലൊരാളായി മാറി.
1950-60 കാലഘട്ടത്തിൽ നിരവധി ഹിറ്റ് ഗാനങ്ങളിലൂടെ ശ്രദ്ധ നേടിയ അവർ എം.എസ്. വിശ്വനാഥൻ–ടി.കെ. രാമമൂർത്തി, ജി. ദേവരാജൻ, കെ.വി. മഹാദേവൻ, ഘന്റസാല തുടങ്ങിയ പ്രമുഖ സംഗീതസംവിധായകരോടൊപ്പം പ്രവർത്തിച്ചു. മലയാളം ഉൾപ്പെടെയുള്ള ദക്ഷിണേന്ത്യൻ ഭാഷാചിത്രങ്ങളിലും അവർ ഗാനങ്ങൾ ആലപിച്ചിട്ടുണ്ട്.
ജമുനാ റാണിയുടെ നിര്യാണത്തിൽ സംഗീത-ചലച്ചിത്രരംഗത്തെ നിരവധി പ്രമുഖർ അനുശോചനം രേഖപ്പെടുത്തി.
