ന്യൂഡൽഹി: കൈകളില്ലാതെ ജനിച്ചിട്ടും അമ്പെയ്ത്തിൽ ലോക ഒന്നാം നമ്പർ താരമായി വളർന്ന ഷീറ്റൽ ദേവിയുടെ ജീവിതയാത്ര പ്രചോദനമാകുന്നു. ജമ്മു കശ്മീരിലെ കിഷ്ത്വാർ ജില്ലയിലെ ലോയ്ധാർ ഗ്രാമത്തിൽ 2007 ജനുവരി 10നാണ് ഷീറ്റൽ ജനിച്ചത്. കൈകളുടെ വളർച്ചയെ ബാധിക്കുന്ന അപൂർവ ജനിതക അവസ്ഥയായ ഫോകോമീലിയയോടെയാണ് ജനനം.
15-ാം വയസിലാണ് ഷീറ്റൽ അമ്പെയ്ത്തിലേക്ക് എത്തുന്നത്. പരിശീലകർ ആദ്യം കൃത്രിമ കൈ ഉപയോഗിച്ച് കായികരംഗത്തേക്ക് കൊണ്ടുവരാൻ ശ്രമിച്ചെങ്കിലും അത് വിജയിച്ചില്ല. തുടർന്ന് നടത്തിയ പരിശോധനയിൽ മികച്ച ശരീരശക്തിയുണ്ടെന്ന് കണ്ടെത്തിയതോടെയാണ് അമ്പെയ്ത്ത് തിരഞ്ഞെടുക്കുന്നത്. കാലുകളും ശരീരവും ഉപയോഗിച്ചാണ് ഷീറ്റൽ വില്ല് നിയന്ത്രിക്കുന്നത്.
2024ലെ പാരിസ് പാരാലിമ്പിക്സിൽ മിക്സഡ് ടീം ഇനത്തിൽ വെങ്കലം നേടിയ ഷീറ്റൽ പിന്നീട് ലോക ചാമ്പ്യൻഷിപ്പിലും ചരിത്രനേട്ടം സ്വന്തമാക്കി. 2025ലെ ലോക പാരാ അമ്പെയ്ത്ത് ചാമ്പ്യൻഷിപ്പിൽ വ്യക്തിഗത സ്വർണം നേടിയ അവർ കൈകളില്ലാത്ത വനിതകളിൽ ലോക കിരീടം നേടുന്ന ആദ്യ താരമായി.
2026 സെപ്റ്റംബറിൽ അഹമ്മദാബാദിൽ നടന്ന വേൾഡ് അമ്പെയ്ത്ത് പാരാ സീരീസ് മൂന്നാം ഘട്ടത്തിൽ വനിതാ കോമ്പൗണ്ട് വിഭാഗത്തിൽ 698 പോയിന്റുമായി ഷീറ്റൽ ഒന്നാം സ്ഥാനം നേടി. ഇതോടെ സ്വന്തം ഏഷ്യൻ റെക്കോർഡും ഒരു പോയിന്റ് മെച്ചപ്പെടുത്തി. റാകേഷ് കുമാറിനൊപ്പം മിക്സഡ് ടീം യോഗ്യതാ റൗണ്ടിൽ 1400 പോയിന്റുമായി ലോക റെക്കോർഡും ഷീറ്റൽ സ്വന്തമാക്കി.
അസാധാരണമായ ശാരീരിക വെല്ലുവിളികളെ മറികടന്ന് അന്താരാഷ്ട്ര കായികരംഗത്ത് സ്വന്തമായ ഇടം കണ്ടെത്തിയ ഷീറ്റൽ ദേവിയുടെ മുന്നേറ്റം ഇന്ത്യൻ പാരാ കായികരംഗത്തെ ശ്രദ്ധേയമായ വിജയഗാഥകളിലൊന്നാണ്.
