ശബരിമല സ്വർണക്കവർച്ച കേസിൽ നിർണായകമായ ശാസ്ത്രീയ പരിശോധനാഫലം പ്രത്യേക അന്വേഷണസംഘത്തിന് (SIT) ലഭിച്ചു. ജംഷഡ്പൂരിലെ നാഷണൽ മെറ്റലർജിക്കൽ ലബോറട്ടറിയിൽ (NML) നടത്തിയ പരിശോധനയിലാണ് സ്വർണം പൂശുന്നതിനായി പുറത്തേക്ക് കൊണ്ടുപോയ കട്ടിളപ്പാളികൾ മാറ്റിയിട്ടില്ലെന്ന് കണ്ടെത്തിയത്. പാളികളിൽ പൊതിഞ്ഞിരുന്ന സ്വർണം മാത്രമാണ് തട്ടിയെടുത്തതെന്ന സൂചനയാണ് റിപ്പോർട്ടിലുള്ളത്.
ശബരിമലയിലെ ദ്വാരപാലക ശിൽപ്പപാളികളിലും കട്ടിളപ്പാളികളിലും നിന്നായി ശേഖരിച്ച എട്ടോളം സാമ്പിളുകളാണ് പരിശോധനയ്ക്ക് അയച്ചിരുന്നത്. ഏകദേശം നാല് മാസം മുമ്പാണ് സാമ്പിളുകൾ ജംഷഡ്പൂരിലെ ലബോറട്ടറിയിലേക്ക് കൈമാറിയത്. ഇപ്പോൾ ലഭിച്ച റിപ്പോർട്ടിൽ ചെമ്പുപാളികളുടെ കാലപ്പഴക്ക നിർണയവുമായി ബന്ധപ്പെട്ട വിവരങ്ങളും ഉൾപ്പെട്ടിട്ടുണ്ട്.
പരിശോധനാഫലം ലഭിച്ചതോടെ കേസിലെ അന്വേഷണം നിർണായക ഘട്ടത്തിലെത്തിയതായി വിലയിരുത്തപ്പെടുന്നു. റിപ്പോർട്ടിന്റെ അടിസ്ഥാനത്തിൽ പ്രതികളുടെ ഉത്തരവാദിത്വം കൂടുതൽ വ്യക്തമായി നിശ്ചയിക്കാനാകുമെന്നാണ് അന്വേഷണസംഘത്തിന്റെ വിലയിരുത്തൽ. കേസിൽ കുറ്റപത്രം ഉടൻ സമർപ്പിച്ചേക്കുമെന്നാണ് സൂചന.
2019-ൽ സ്വർണപ്പൂശൽ നവീകരണത്തിനായി മാറ്റിയ ദ്വാരപാലക ശിൽപ്പപാളികളിലും ശ്രീകോവിൽ ഭാഗങ്ങളിലുമുണ്ടായ സ്വർണനഷ്ടവുമായി ബന്ധപ്പെട്ട ആരോപണങ്ങളിലാണ് ഹൈക്കോടതിയുടെ മേൽനോട്ടത്തിൽ പ്രത്യേക അന്വേഷണം പുരോഗമിക്കുന്നത്. സാമ്പിളുകളുടെ ശാസ്ത്രീയ പരിശോധനാഫലം അന്വേഷണത്തിലെ പ്രധാന തെളിവായി കണക്കാക്കപ്പെടുന്നു.
