മോസ്കോ: ലോകത്തിലെ ഏറ്റവും ശക്തമായ ആണവ പോർമുന വഹിക്കാവുന്ന മിസൈലുകളിൽ ഒന്നായ ആർ.എസ്-28 സർമാത് (RS-28 Sarmat), അഥവാ പാശ്ചാത്യ രാജ്യങ്ങൾ ‘സെയ്റ്റൻ II’ (Satan II) എന്ന് വിളിക്കുന്ന മിസൈൽ റഷ്യ വിജയകരമായി പരീക്ഷിച്ചു. റഷ്യയുടെ ആയുധപ്പുരയിലെ ഏറ്റവും മാരകമായ ഈ മിസൈൽ പരീക്ഷണം ആഗോളതലത്തിൽ വലിയ ആശങ്കകൾക്ക് വഴിമാറുകയാണ്.
വടക്കൻ റഷ്യയിലെ പ്ലെസെറ്റ്സ്ക് കോസ്മോഡ്രോമിൽ നിന്നാണ് മിസൈൽ വിക്ഷേപിച്ചത്. ഏകദേശം 6,000 കിലോമീറ്റർ അകലെയുള്ള കംചത്ക ഉപദ്വീപിലെ ലക്ഷ്യസ്ഥാനത്ത് മിസൈൽ കൃത്യമായി പതിച്ചതായി റഷ്യൻ പ്രതിരോധ മന്ത്രാലയം അറിയിച്ചു. പരീക്ഷണം വിജയകരമാണെന്നും റഷ്യയുടെ പ്രതിരോധ ശേഷി വർദ്ധിപ്പിക്കുന്നതിൽ ഈ മിസൈൽ നിർണ്ണായക പങ്കുവഹിക്കുമെന്നും പ്രസിഡന്റ് വ്ളാഡിമിർ പുടിൻ വ്യക്തമാക്കി.
മണിക്കൂറിൽ 16,000 മൈൽ വേഗതയിൽ സഞ്ചരിക്കാൻ ശേഷിയുള്ള ഈ മിസൈൽ, ലോകത്തിലെ ഏത് മിസൈൽ പ്രതിരോധ സംവിധാനത്തെയും വെട്ടിച്ച് ലക്ഷ്യസ്ഥാനത്ത് എത്താൻ പ്രാപ്തമാണ്.10 മുതൽ 15 വരെ സ്വതന്ത്രമായി ലക്ഷ്യസ്ഥാനങ്ങളിലേക്ക് കുതിക്കുന്ന ആണവ പോർമുനകൾ (MIRV) ഒരേസമയം വഹിക്കാൻ ഈ മിസൈലിന് സാധിക്കും.18,000 കിലോമീറ്റർ ദൂരപരിധിയുള്ള ഈ മിസൈലിന് ലോകത്തിന്റെ ഏത് കോണിലും പ്രഹരമേൽപ്പിക്കാൻ കഴിയും. ദക്ഷിണ ധ്രുവത്തിലൂടെയോ ഉത്തരാധ്രുവത്തിലൂടെയോ സഞ്ചരിച്ച് അമേരിക്കയിലെ ലക്ഷ്യസ്ഥാനങ്ങൾ ആക്രമിക്കാനും ഇതിന് ശേഷിയുണ്ട്.
നിലവിലുള്ള ‘വോയേവോഡ’ (Voevoda) മിസൈലുകൾക്ക് പകരമായാണ് റഷ്യ സർമാത് മിസൈലുകൾ സൈന്യത്തിന്റെ ഭാഗമാക്കുന്നത്. പടിഞ്ഞാറൻ രാജ്യങ്ങളുമായുള്ള സംഘർഷം നിലനിൽക്കുന്ന പശ്ചാത്തലത്തിൽ, റഷ്യയുടെ ഈ സൈനിക പ്രകടനം തങ്ങളെ ഭീഷണിപ്പെടുത്താൻ ശ്രമിക്കുന്നവർക്കുള്ള താക്കീതാണെന്ന് പുടിൻ കൂട്ടിച്ചേർത്തു. മിസൈൽ പരീക്ഷണത്തെക്കുറിച്ച് അന്താരാഷ്ട്ര ഉടമ്പടികൾ പ്രകാരം റഷ്യ മുൻകൂട്ടി വിവരം നൽകിയിരുന്നതായി പെന്റഗൺ വക്താക്കൾ അറിയിച്ചു.
