മെൽബൺ/സിഡ്നി: സിറിയയിലെ തടങ്കൽപ്പാളയത്തിൽ കഴിഞ്ഞിരുന്ന, ഇസ്ലാമിക് സ്റ്റേറ്റുമായി (ഐഎസ്) ബന്ധമുള്ള രണ്ടാമത്തെ സംഘം ഓസ്ട്രേലിയൻ നഗരങ്ങളായ സിഡ്നിയിലും മെൽബണിലും എത്തിച്ചേർന്ന സംഭവത്തിൽ രാഷ്ട്രീയ-ഭരണ നേതൃത്വം പരസ്യ പ്രതികരണങ്ങളിൽ നിന്ന് വിട്ടുനിൽക്കുന്നു. ആറ് സ്ത്രീകളും 12 കുട്ടികളും അടങ്ങുന്ന 18 അംഗ സംഘം ഈ ആഴ്ച ആദ്യം ഓസ്ട്രേലിയയിൽ തിരിച്ചെത്തിയതിന് ശേഷം പ്രധാനമന്ത്രി ആന്റണി അൽബനീസും ആഭ്യന്തരമന്ത്രി ടോണി ബർക്കും മാധ്യമങ്ങളെ കാണാൻ തയ്യാറായിട്ടില്ല.
വിഷയത്തിൽ സർക്കാരിന്റെ പ്രതികരണം തേടിയ മാധ്യമങ്ങളോട്, സംഘം എത്തുന്നതിന് തൊട്ടുമുമ്പ് ആഭ്യന്ത രമന്ത്രി പുറപ്പെടുവിച്ച പ്രസ്താവന ചൂണ്ടിക്കാണിക്കുകയാണ് അധികൃതർ ചെയ്തത്. ആരെങ്കിലും കുറ്റകൃത്യ ങ്ങളിൽ ഏർപ്പെട്ടിട്ടുണ്ടെന്ന് കണ്ടെത്തിയാൽ അവർ നിയമത്തിന്റെ പരമാവധി ശിക്ഷ നേരിടേണ്ടിവരുമെന്നാണ് ടോണി ബർക്ക് പ്രസ്താവനയിൽ വ്യക്തമാക്കിയിരുന്നത്. കൂടാതെ, ഈ സംഘത്തിന് സർക്കാർ യാതൊരുവിധ സഹായവും നൽകിയിട്ടില്ലെന്നും അപകടകരമായ ഒരു ഭീകരസംഘടനയിൽ ചേരാനും സ്വന്തം കുട്ടികളെ ദുരിത ത്തിലാക്കാനും ഇവർ സ്വയം എടുത്ത തീരുമാനമാണിതെന്നും അദ്ദേഹം കടുത്ത ഭാഷയിൽ വിമർശിച്ചിരുന്നു.
അതേസമയം, പുതിയ സംഘം വിമാനത്താവളങ്ങളിൽ ഇറങ്ങിയതിന് പിന്നാലെ ആർക്കെതിരെയും നിലവിൽ കുറ്റപത്രങ്ങളോ അറസ്റ്റുകളോ രേഖപ്പെടുത്തിയിട്ടില്ലെന്ന് ഓസ്ട്രേലിയൻ ഫെഡറൽ പോലീസ് (AFP) സ്ഥിരീകരി ച്ചു എന്നാൽ, സിറിയയിലേക്ക് യാത്ര ചെയ്ത ഓസ്ട്രേലിയൻ പൗരന്മാർക്കെതിരെയുള്ള അന്വേഷണങ്ങൾ ഇപ്പോഴും തുടരുകയാണെന്ന് പോലീസ് വ്യക്തമാക്കി. നഗരങ്ങളിൽ തിരിച്ചിറങ്ങിയ സ്ത്രീകളെ കർശനമായ സുരക്ഷാ പരിശോധനകൾക്ക് വിധേയമാക്കുകയും അവരുടെ ഇലക്ട്രോണിക് ഉപകരണങ്ങൾ വിശദമായ അന്വേഷണങ്ങൾക്കായി ശേഖരിക്കുകയും ചെയ്തിട്ടുണ്ട്.
വിഷയത്തിന്റെ തന്ത്രപ്രധാനമായ സ്വഭാവം കണക്കിലെടുത്ത്, ഓസ്ട്രേലിയൻ ഫെഡറൽ പോലീസ് കമ്മീഷണർ ക്രിസി ബാരറ്റും സംഭവത്തിന് ശേഷം മാധ്യമങ്ങളോട് സംസാരിക്കാൻ തയ്യാറായില്ല. എന്നാൽ, തിരിച്ചെത്തിയ വർക്കെതിരെ നിലവിൽ കുറ്റങ്ങളൊന്നും ചുമത്താത്തതിനെക്കുറിച്ചും അതിന്റെ കാരണങ്ങളെക്കുറിച്ചും പൊതുസമൂഹത്തോട് വ്യക്തമായ വിശദീകരണം നൽകാത്തതിനെ മുൻ ഫെഡറൽ പോലീസ് സൂപ്രണ്ട് ഡേവിഡ് ക്രെയ്ഗ് രൂക്ഷമായി വിമർശിച്ചു.
ഈ മാസമാദ്യം എത്തിയ ആദ്യ സംഘത്തിലെ മൂന്ന് സ്ത്രീകളെ അടിമത്തം, ഭീകരസംഘടനയിൽ അംഗത്വം തുടങ്ങിയ കുറ്റങ്ങൾ ചുമത്തി വിമാനത്താവളത്തിൽ വെച്ച് തന്നെ പോലീസ് അറസ്റ്റ് ചെയ്തിരുന്നു. പുതിയ സംഘത്തിന്റെ വരവോടെ, സിറിയൻ തടങ്കൽപ്പാളയത്തിൽ അവശേഷിച്ചിരുന്ന ഓസ്ട്രേലിയൻ പൗരന്മാരിൽ രണ്ട് പേരൊഴികെ മറ്റെല്ലാവരും രാജ്യത്ത് തിരിച്ചെത്തിക്കഴിഞ്ഞു. ഒരു സ്ത്രീക്ക് മേൽ ഓസ്ട്രേലിയൻ സർക്കാർ താൽക്കാലിക യാത്രാവിലക്ക് (Temporary Exclusion Order) ഏർപ്പെടുത്തിയതിനെ തുടർന്നാണ് അവർക്ക് മകൾക്കൊപ്പം സിറിയയിൽ തന്നെ തുടരേണ്ടി വന്നത്.
