ന്യൂഡൽഹി: ലഡാക്ക് സാമൂഹിക പ്രവർത്തകൻ സോനം വാങ്ചുക്കിനെ ആരോഗ്യനില മോശമായതിനെ തുടർന്ന് ഡൽഹിയിലെ സഫ്ദർജംഗ് ആശുപത്രിയിലേക്ക് മാറ്റി. ആശുപത്രിയിലേക്ക് കൊണ്ടുപോകുന്നതിനിടെ ഡൽഹി പൊലീസ് അറസ്റ്റ് ചെയ്തെന്ന ആരോപണം പ്രതിഷേധസംഘാടകർ ഉയർത്തിയെങ്കിലും ഇത് പൊലീസ് നിഷേധിച്ചു.
ജന്തർ മന്തറിൽ അനിശ്ചിതകാല നിരാഹാരസമരം തുടരുന്നതിനിടെയാണ് വാങ്ചുക്കിന്റെ ആരോഗ്യനില വഷളായത്. ഡോക്ടർമാരുടെ നിർദേശപ്രകാരമാണ് ആശുപത്രിയിലേക്ക് മാറ്റിയതെന്നും അദ്ദേഹത്തെ അറസ്റ്റ് ചെയ്തിട്ടില്ലെന്നും ഡൽഹി പൊലീസ് അറിയിച്ചു.
അതേസമയം, വാങ്ചുക്കിനെ ബലമായി ആശുപത്രിയിലേക്ക് കൊണ്ടുപോയെന്നാണ് പ്രതിഷേധക്കാരുടെയും കുടുംബാംഗങ്ങളുടെയും ആരോപണം. ചികിത്സ സംബന്ധിച്ച തീരുമാനങ്ങൾ അദ്ദേഹത്തിന്റെ സമ്മതത്തോടെയായിരിക്കണമെന്ന് കുടുംബം ആവശ്യപ്പെട്ടു.
വാങ്ചുക്കിന്റെ ആരോഗ്യനില നിലവിൽ സ്ഥിരമാണെന്നും തുടർ ചികിത്സയ്ക്കും നിരീക്ഷണത്തിനുമായി ആശുപത്രിയിൽ പ്രവേശിപ്പിച്ചതായും ആശുപത്രി അധികൃതർ അറിയിച്ചു.
