വാഷിങ്ടൺ: ഹോർമുസ് കടലിടുക്ക് എല്ലാ കപ്പലുകൾക്കും തുറന്നുകിടക്കുന്നതായും കടലിടുക്കിലൂടെയുള്ള സുരക്ഷിതമായ കപ്പൽഗതാഗതം ഉറപ്പാക്കാൻ അമേരിക്കൻ സൈന്യം സജ്ജമാണെന്നും യു.എസ്. സെൻട്രൽ കമാൻഡ് (CENTCOM) അറിയിച്ചു. ഇറാൻ കടലിടുക്ക് അടച്ചതായി പ്രഖ്യാപിച്ചതിന് പിന്നാലെയാണ് അമേരിക്കയുടെ പ്രതികരണം.
ആഗോള എണ്ണവ്യാപാരത്തിന്റെ പ്രധാന പാതയായ ഹോർമുസ് കടലിടുക്കിലൂടെ കപ്പലുകൾക്ക് തടസ്സമില്ലാതെ സഞ്ചരിക്കാനുള്ള സാഹചര്യം നിലനിർത്താൻ ആവശ്യമായ സൈനിക സന്നാഹങ്ങൾ ഒരുക്കിയിട്ടുണ്ടെന്ന് സെൻട്രൽ കമാൻഡ് വ്യക്തമാക്കി. നാവിഗേഷൻ സ്വാതന്ത്ര്യം സംരക്ഷിക്കുന്നതിന് അമേരിക്ക പ്രതിബദ്ധമാണെന്നും അറിയിപ്പിൽ പറയുന്നു.
അമേരിക്കൻ-ഇറാൻ സൈനിക സംഘർഷം രൂക്ഷമായ സാഹചര്യത്തിൽ ഹോർമുസ് കടലിടുക്കിന്റെ സുരക്ഷ അന്താരാഷ്ട്ര തലത്തിൽ ആശങ്ക ഉയർത്തിയിട്ടുണ്ട്. കടലിടുക്കിലെ സ്ഥിതിഗതികൾ ലോക ഊർജവിപണിയെയും സമുദ്രവ്യാപാരത്തെയും നേരിട്ട് ബാധിക്കാനിടയുള്ളതിനാൽ സംഭവവികാസങ്ങൾ ലോകരാജ്യങ്ങൾ അടുത്തുനിന്ന് നിരീക്ഷിച്ചുവരികയാണ്.
