സനാ: യെമനിലെ ഇറാൻ അനുകൂല ഹൂതി വിമതർ ചെങ്കടലിലെ തന്ത്രപ്രധാനമായ ഹനീഷ് ദ്വീപസമൂഹത്തിലെ ഗ്രേറ്റർ ഹനീഷ്, ലെസ്സർ ഹനീഷ് ദ്വീപുകൾ പിടിച്ചെടുത്തതായി റിപ്പോർട്ട്. യെമന്റെ പടിഞ്ഞാറൻ തീരമേഖലയിൽ ഹൂതികൾ നടത്തിയ അതിവേഗ മുന്നേറ്റത്തിന്റെ തുടർച്ചയായാണ് ദ്വീപുകൾക്ക് മേൽ നിയന്ത്രണം സ്ഥാപിച്ചതെന്നാണ് റിപ്പോർട്ടുകൾ.
ചെങ്കടലിനെയും ഏഡൻ ഉൾക്കടലിനെയും ബന്ധിപ്പിക്കുന്ന ബാബ് അൽ-മന്ദബ് കടലിടുക്കിന് സമീപമാണ് ഹനീഷ് ദ്വീപുകൾ സ്ഥിതി ചെയ്യുന്നത്. നേരത്തെ പെരിം (മയ്യൂൻ), സുക്കർ ദ്വീപുകളും ഹൂതികളുടെ നിയന്ത്രണത്തിലായതായി റിപ്പോർട്ടുകൾ പുറത്തുവന്നിരുന്നു. ഇതോടെ യെമന്റെ പടിഞ്ഞാറൻ തീരത്തും കടലിടുക്കിനോട് ചേർന്നുള്ള തന്ത്രപ്രധാന പ്രദേശങ്ങളിലും ഹൂതികളുടെ സ്വാധീനം ശക്തമായതായി വിലയിരുത്തപ്പെടുന്നു.
സെപ്റ്റംബർ 10ന് തന്ത്രപ്രധാന തുറമുഖ നഗരമായ മൊഖ ഹൂതികൾ പിടിച്ചെടുത്തതിന് പിന്നാലെയാണ് തീരമേഖലയിലെ മുന്നേറ്റം ശക്തമായത്. സർക്കാർ അനുകൂല സേനകൾ പിന്മാറിയതോടെയാണ് ചില പ്രദേശങ്ങളും ദ്വീപുകളും ഹൂതി നിയന്ത്രണത്തിലായതെന്നാണ് റിപ്പോർട്ടുകൾ.
ബാബ് അൽ-മന്ദബ് കടലിടുക്ക് ആഗോള കപ്പൽഗതാഗതത്തിലെ പ്രധാന പാതകളിലൊന്നാണ്. ഏഷ്യയിൽനിന്ന് ചെങ്കടൽ വഴി സൂയസ് കനാലിലേക്കും തുടർന്ന് യൂറോപ്പിലേക്കുമുള്ള ചരക്കുനീക്കത്തിന് ഈ ജലപാത നിർണായകമാണ്. മേഖലയിലെ സംഘർഷം രൂക്ഷമായാൽ കപ്പൽ കമ്പനികൾ കൂടുതൽ ദൈർഘ്യമേറിയ ബദൽ പാതകൾ സ്വീകരിക്കേണ്ടിവരാനും ഇതുവഴി ഗതാഗതച്ചെലവും ഇൻഷുറൻസ് ചെലവും വർധിക്കാനും സാധ്യതയുണ്ടെന്ന് വിദഗ്ധർ ചൂണ്ടിക്കാട്ടുന്നു.
അതേസമയം, അന്താരാഷ്ട്ര കപ്പൽഗതാഗതത്തിന് തങ്ങളുടെ നിയന്ത്രണത്തിലുള്ള പ്രദേശങ്ങളിൽനിന്ന് ഭീഷണിയില്ലെന്നാണ് ഹൂതി വക്താക്കൾ പറയുന്നത്. എന്നാൽ സൗദി അറേബ്യയുമായി ബന്ധപ്പെട്ട കപ്പലുകൾക്ക് വിലക്ക് തുടരുമെന്നും അവർ വ്യക്തമാക്കിയിട്ടുണ്ട്.
ഹൂതികളുടെ മുന്നേറ്റത്തിനിടെ യെമനിൽനിന്ന് പതിനായിരക്കണക്കിന് ആളുകൾ വീടുകൾ വിട്ടുപോയതായി ഐക്യരാഷ്ട്രസഭയുടെ കുടിയേറ്റ ഏജൻസിയെ ഉദ്ധരിച്ചുള്ള റിപ്പോർട്ടുകൾ വ്യക്തമാക്കുന്നു. സംഘർഷം ശക്തമാകുന്നത് യെമനിലെ നേരത്തെയുള്ള മാനുഷിക പ്രതിസന്ധി കൂടുതൽ രൂക്ഷമാക്കുമെന്ന ആശങ്കയും നിലനിൽക്കുന്നു.
ബാബ് അൽ-മന്ദബിന് സമീപമുള്ള തന്ത്രപ്രധാന പ്രദേശങ്ങളിൽ ഹൂതികളുടെ നിയന്ത്രണം വർധിക്കുന്നത് പ്രാദേശിക സുരക്ഷയ്ക്കൊപ്പം ചെങ്കടൽ വഴിയുള്ള അന്താരാഷ്ട്ര വ്യാപാരത്തിനും പുതിയ വെല്ലുവിളിയാണ്. മേഖലയിലെ സംഘർഷം കൂടുതൽ വ്യാപിക്കുമോയെന്നതിലാണ് രാജ്യങ്ങളുടെ ശ്രദ്ധ.
