മുംബൈ:ഡൽഹിയിൽ ആരംഭിച്ച വിദ്യാർഥി പ്രതിഷേധം രാജ്യത്തിന്റെ വിവിധ ഭാഗങ്ങളിലേക്ക് വ്യാപിക്കുകയാണ്. പരീക്ഷാ ക്രമക്കേടുകൾ, വിദ്യാഭ്യാസ മേഖലയിലെ പരിഷ്കാരങ്ങൾ, കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കുക തുടങ്ങിയ ആവശ്യങ്ങൾ ഉന്നയിച്ചാണ് പ്രതിഷേധം ശക്തമാകുന്നത്.
ബെംഗളൂരു, മുംബൈ, കൊൽക്കത്ത, ഹൈദരാബാദ്, ചെന്നൈ എന്നിവ ഉൾപ്പെടെയുള്ള നഗരങ്ങളിൽ വിദ്യാർഥികളും യുവജന സംഘടനകളും ഐക്യദാർഢ്യ പ്രതിഷേധങ്ങൾ സംഘടിപ്പിച്ചു. ഡൽഹിയിലെ പൊലീസ് നടപടിക്കെതിരെ വിവിധ സംസ്ഥാനങ്ങളിലെയും സർവകലാശാലകളിലെയും വിദ്യാർഥികൾ പ്രതിഷേധവുമായി രംഗത്തെത്തിയിട്ടുണ്ട്.
അതേസമയം, പ്രതിഷേധം രാഷ്ട്രീയവത്കരിക്കുകയാണെന്ന് കേന്ദ്ര സർക്കാർ ആരോപിച്ചു. പ്രതിപക്ഷം വിദ്യാർഥികളുടെ ആവശ്യങ്ങൾക്ക് പിന്തുണ പ്രഖ്യാപിച്ചിരിക്കെ, പ്രതിഷേധം അവസാനിപ്പിക്കില്ലെന്നും ആവശ്യങ്ങൾ അംഗീകരിക്കുന്നതുവരെ സമരം തുടരുമെന്നും പ്രതിഷേധക്കാർ അറിയിച്ചു.
