ന്യൂഡൽഹി: മാതൃരാജ്യത്തിന്റെ അന്തസ്സിനെ മുറിവേൽപ്പിക്കുകയും സമൂഹത്തെ ഭിന്നിപ്പിക്കുകയും ചെയ്യുന്ന പ്രവണതകളെ ഒറ്റക്കെട്ടായി എതിർക്കണമെന്ന് പ്രധാനമന്ത്രി നരേന്ദ്ര മോദി ആഹ്വാനം ചെയ്തു. ഡൽഹി ഐ.പി. എക്സ്റ്റൻഷനിലുള്ള ഡി.ഡി.എ ഉത്സവ് ഗ്രൗണ്ടിൽ സംഘടിപ്പിച്ച വിജയദശമി ആഘോഷങ്ങളിൽ പങ്കെടുത്ത് സംസാരിക്കുകയായിരുന്നു അദ്ദേഹം. രാവണദഹനം ഉൾപ്പെടെയുള്ള പരമ്പരാഗത ചടങ്ങുകൾക്ക് സാക്ഷ്യം വഹിച്ച അദ്ദേഹം, നന്മയുടെയും സത്യത്തിന്റെയും വിജയപ്രതീകമാണ് വിജയദശമിയെന്ന് ഓർമ്മിപ്പിച്ചു. ‘രാഷ്ട്രം ആദ്യം’ എന്ന വികാരം ഉയർത്തിപ്പിടിച്ച് രാജ്യത്തിന്റെ പുരോഗതിക്കായി എല്ലാവരും ഒന്നിക്കണമെന്നും അദ്ദേഹം ആവശ്യപ്പെട്ടു.
മാതൃഭൂമിയുടെ സാംസ്കാരിക പാരമ്പര്യത്തെ വെറുക്കുന്നവരും സമൂഹത്തിൽ വിദ്വേഷം വിതയ്ക്കുന്നവരുമാണ് രാജ്യത്തിന്റെ യഥാർത്ഥ ശത്രുക്കളെന്ന് പ്രധാനമന്ത്രി ചൂണ്ടിക്കാട്ടി. ഇത്തരം ശക്തികളെ തിരിച്ചറിഞ്ഞ് പരാജയപ്പെടുത്താൻ ജനങ്ങൾ ഒന്നിച്ച് അണിനിരക്കണം. അയോധ്യയിലെ രാമക്ഷേത്ര പ്രതിഷ്ഠാ ചടങ്ങിൽ മുന്നോട്ടുവെച്ച സങ്കൽപ്പം യാഥാർത്ഥ്യമാക്കാനുള്ള സമയമാണിതെന്നും, ദൈവികതയിൽ നിന്ന് രാഷ്ട്രനിർമ്മാണത്തിലേക്ക് മുന്നേറാൻ ഭാരതീയർ കൈകോർക്കണമെന്നും അദ്ദേഹം വ്യക്തമാക്കി.
ശ്രീരാമന്റെ ജീവിതം വിഭാവനം ചെയ്യുന്ന ‘രാമരാജ്യം’ നീതിയിലും സമത്വത്തിലും അധിഷ്ഠിതമായ ഭരണനേതൃത്വ മാതൃകയാണെന്ന് പ്രധാനമന്ത്രി അഭിപ്രായപ്പെട്ടു. അധികാരത്തിന്റെ പരമമായ ലക്ഷ്യം ജനക്ഷേമം മാത്രമാണെന്നും അവിടെ വിവേചനങ്ങൾക്ക് സ്ഥാനമില്ലെന്നും അദ്ദേഹം കൂട്ടിച്ചേർത്തു. ഇന്ത്യയെ പൂർണ്ണ സ്വയംപര്യാപ്തതയിലേക്ക് നയിക്കാൻ രാജ്യത്തിന്റെ സ്വന്തം വിഭവങ്ങളിലും അധ്വാനത്തിലും വിശ്വാസമർപ്പിക്കണം. എത്ര വലിയ വെല്ലുവിളികൾ നേരിട്ടാലും സത്യത്തിന്റെ പക്ഷത്ത് ഉറച്ചുനിൽക്കുമ്പോൾ വിജയം സുനിശ്ചിതമാണെന്ന് അദ്ദേഹം വ്യക്തമാക്കി.
