സിഡ്നി: ഓൺലൈൻ വഴി കുട്ടികളെ ലൈംഗികമായി ദുരുപയോഗം ചെയ്യുകയും ചൂഷണം ചെയ്യുകയും ചെയ്ത സംഭവങ്ങളിൽ ന്യൂ സൗത്ത് വെയിൽസിൽ (NSW) മൂന്ന് പേർക്കെതിരെ പോലീസ് കുറ്റം ചുമത്തി. എൻ.എസ്.ഡബ്ല്യു പോലീസ് സെക്സ് ക്രൈംസ് സ്ക്വാഡ് നടത്തിയ പ്രത്യേക അന്വേഷണത്തെ തുടർന്നാണ് 25, 30, 82 വയസ്സുള്ള മൂന്ന് പേർ പിടിയിലായത്.
സൗത്ത് ഗ്രാഫ്റ്റണിൽ പോലീസ് നടത്തിയ പരിശോധനയിൽ നിരവധി ഇലക്ട്രോണിക് ഉപകരണങ്ങൾ പിടിച്ചെടുക്കുകയും 25, 30 വയസ്സുള്ള രണ്ട് യുവാക്കളെ അറസ്റ്റ് ചെയ്യുകയുമായിരുന്നു. ഇതിൽ 30-കാരനെതിരെ കുട്ടികളെ ചൂഷണം ചെയ്യുന്ന ദൃശ്യങ്ങൾ പ്രചരിപ്പിക്കൽ, അത്തരം സാമഗ്രികൾ ആവശ്യപ്പെടൽ, 16 വയസ്സിൽ താഴെയുള്ള കുട്ടിയുമായി ലൈംഗിക ബന്ധത്തിന് പദ്ധതിയിടൽ തുടങ്ങി അതീവ ഗുരുതരമായ നിരവധി വകുപ്പുകളാണ് ചുമത്തിയിരിക്കുന്നത്. 25-കാരനെതിരെ കുട്ടികളെ പീഡിപ്പിക്കുന്ന ദൃശ്യങ്ങൾ കൈവശം വെച്ചതിനും അവ കാണാൻ ശ്രമിച്ചതിനും കേസെടുത്തു. കോടതിയിൽ ഹാജരാക്കിയ ഇരുവരുടെയും ജാമ്യാപേക്ഷ തള്ളി.
തുടർന്ന് ഫോർസ്റ്ററിൽ നടത്തിയ മറ്റൊരു പരിശോധനയിലാണ് 82 വയസ്സുള്ള വയോധികൻ പോലീസിന്റെ പിടിയിലാകുന്നത്. 16 വയസ്സിൽ താഴെയുള്ള കുട്ടിയെ ലൈംഗിക ചൂഷണത്തിന് വിധേയമാക്കാൻ ശ്രമിച്ചതിനും (ഓൺലൈൻ ഗ്രൂമിംഗ്) അശ്ലീല ദൃശ്യങ്ങൾ ആവശ്യപ്പെട്ടതിനുമാണ് ഇയാൾക്കെതിരെ കേസെടുത്തിട്ടുള്ളത്. ഇയാൾക്ക് പിന്നീട് കോടതി കർശന വ്യവസ്ഥകളോടെ ജാമ്യം അനുവദിച്ചു. ഓൺലൈൻ വഴി കുട്ടികൾക്കെതിരെ നടക്കുന്ന ഇത്തരം ക്രൂരമായ ലൈംഗിക അതിക്രമങ്ങളിൽ ഉൾപ്പെടുന്ന പ്രതികൾക്ക് പരോളില്ലാത്ത കഠിനതടവ് ഉൾപ്പെടെയുള്ള കർശന ശിക്ഷ ഉറപ്പാക്കണമെന്ന ആവശ്യവും ഇതോടെ വീണ്ടും ശക്തമായിട്ടുണ്ട്.
