ഇടുക്കി: മൂന്നാർ ചിന്നക്കനാൽ പെരിയകനാലിൽ വിനോദസഞ്ചാരികൾ സഞ്ചരിച്ച മിനി ബസ് നിയന്ത്രണം വിട്ട് കൊക്കയിലേക്ക് മറിഞ്ഞ് ഒരാൾ മരിച്ചു. തമിഴ്നാട് വിരുതുനഗർ ജില്ലയിലെ പരലാച്ചി സ്വദേശി സ്റ്റെല്ലാ മേരിയാണ് മരിച്ചത്. ബസ് ഡ്രൈവർ ഉൾപ്പെടെ വാഹനത്തിലുണ്ടായിരുന്ന മറ്റ് 26 പേർക്കും അപകടത്തിൽ പരിക്കേറ്റു.
തമിഴ്നാട്ടിലെ പരലാച്ചിയിൽ നിന്നും വിനോദസഞ്ചാരത്തിനായി എത്തിയ സംഘമാണ് അപകടത്തിൽപ്പെട്ടത്. പെരിയകനാലിന് സമീപത്തെ കുത്തിറക്കത്തിൽ വെച്ച് ബസിന്റെ നിയന്ത്രണം നഷ്ടമാവുകയും സംരക്ഷണ ഭിത്തി തകർത്ത് താഴ്ചയിലേക്ക് മറിയുകയുമായിരുന്നു. അപകടം നടന്നയുടനെ നാട്ടുകാരും പോലീസും ചേർന്ന് രക്ഷാപ്രവർത്തനം നടത്തി. പരിക്കേറ്റവരെ ഉടൻ തന്നെ സമീപത്തെ ആശുപത്രികളിൽ പ്രവേശിപ്പിച്ചു.
ഇടുക്കിയിലെ മലയോര മേഖലകളിൽ മഴയെത്തുടർന്ന് റോഡുകളിൽ തെന്നലുണ്ടാകാൻ സാധ്യതയുള്ളതിനാൽ ഡ്രൈവർമാർ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. മരിച്ച സ്റ്റെല്ലാ മേരിയുടെ മൃതദേഹം പോസ്റ്റുമോർട്ടം നടപടികൾക്കായി മാറ്റി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്
