വാഷിങ്ടൺ: ഗൾഫ് മേഖലയിലെ സഖ്യരാജ്യങ്ങളുടെ അഭ്യർഥനയെ തുടർന്ന് ഇറാനെതിരേ ആസൂത്രണം ചെയ്തിരുന്ന വൻ സൈനികാക്രമണം അമേരിക്കൻ പ്രസിഡന്റ് ഡൊണാൾഡ് ട്രംപ് അവസാന നിമിഷം പിൻവലിച്ചതായി അറിയിച്ചു. ആക്രമണം ഒഴിവാക്കി നയതന്ത്ര ചർച്ചകൾക്ക് അവസരം നൽകാനാണ് തീരുമാനിച്ചതെന്നും അദ്ദേഹം വ്യക്തമാക്കി.
ഹോർമുസ് കടലിടുക്കിലെ കപ്പൽഗതാഗതവും മേഖലയിലെ സംഘർഷാവസ്ഥയും സംബന്ധിച്ച വിഷയങ്ങളിൽ ഇറാനുമായി ചർച്ചകൾ ആരംഭിക്കുമെന്ന് ട്രംപ് അവകാശപ്പെട്ടു. എന്നാൽ അമേരിക്കയുമായി നേരിട്ടുള്ള ചർച്ചകൾക്ക് ധാരണയായിട്ടില്ലെന്നും അത്തരം ചർച്ചകൾ നിശ്ചയിച്ചിട്ടില്ലെന്നും ഇറാൻ വിദേശകാര്യ മന്ത്രാലയം പ്രതികരിച്ചു. നിലവിൽ ഒമാനുമായി ഹോർമുസ് കടലിടുക്കിലെ കപ്പൽഗതാഗതവുമായി ബന്ധപ്പെട്ട വിഷയങ്ങളിലാണ് ആശയവിനിമയം നടക്കുന്നതെന്നാണ് ഇറാന്റെ വിശദീകരണം.
സംഘർഷം ശമിക്കുമെന്ന പ്രതീക്ഷ ഉയർന്നതോടെ അന്താരാഷ്ട്ര എണ്ണവിലയിൽ ഇടിവ് രേഖപ്പെടുത്തിയെങ്കിലും മേഖലയിലെ സുരക്ഷാ സാഹചര്യം ഇപ്പോഴും അനിശ്ചിതമായി തുടരുകയാണെന്ന് വിലയിരുത്തപ്പെടുന്നു.
