ഡമാസ്കസ്: സിറിയൻ തലസ്ഥാനമായ ഡമാസ്കസിൽ ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഔദ്യോഗിക സന്ദർശനം നടത്തുന്നതിനിടെ രണ്ട് സ്ഫോടനങ്ങൾ ഉണ്ടായി. മാക്രോൺ താമസിച്ചിരുന്ന ഫോർ സീസൺസ് ഹോട്ടലിന് സമീപമാണ് സ്ഫോടനങ്ങൾ നടന്നത്. സംഭവത്തിൽ നാല് പോലീസ് ഉദ്യോഗസ്ഥർ ഉൾപ്പെടെ 18 പേർക്ക് പരിക്കേറ്റതായി സിറിയൻ ആഭ്യന്തര മന്ത്രാലയം അറിയിച്ചു.
മാലിന്യക്കൂമ്പാരത്തിലും സമീപത്തെ വാഹനത്തിലുമായി സ്ഥാപിച്ചിരുന്ന താൽക്കാലിക സ്ഫോടകവസ്തുക്കളാണ് പൊട്ടിത്തെറിച്ചതെന്നാണ് പ്രാഥമിക അന്വേഷണത്തിൽ കണ്ടെത്തിയത്. സ്ഫോടനസമയത്ത് മാക്രോൺ സിറിയൻ പ്രസിഡന്റ് അഹ്മദ് അൽ- ഷാറയുമായി കൂടിക്കാഴ്ചയ്ക്കായി പ്രസിഡൻഷ്യൽ പാലസിലേക്ക് പോകുകയായിരുന്നു. അദ്ദേഹത്തിന് പരിക്കില്ലെന്നും ഔദ്യോഗിക പരിപാടികൾ നിശ്ചയിച്ച പ്രകാരം തുടർന്നതായും ഫ്രഞ്ച് അധികൃതർ അറിയിച്ചു.
ആക്രമണത്തിന്റെ ഉത്തരവാദിത്തം ഇതുവരെ ഒരു സംഘടനയും ഏറ്റെടുത്തിട്ടില്ല. സംഭവത്തിൽ അന്വേഷണം പുരോഗമിക്കുകയാണെന്ന് സിറിയൻ ആഭ്യന്തര മന്ത്രാലയം അറിയിച്ചു. ഏതാനും ദിവസങ്ങൾക്ക് മുമ്പ് ഡമാസ്കസിൽ നടന്ന മറ്റൊരു ബോംബാക്രമണത്തിന് പിന്നാലെയാണ് ഈ സ്ഫോടനവും ഉണ്ടായിരിക്കുന്നത്.
