കാഠ്മണ്ഡു: ലോകത്തിലെ ഏറ്റവും ഉയർന്ന കൊടുമുടിയായ എവറസ്റ്റ് കീഴടക്കാൻ എത്തുന്ന പർവതാരോഹകരുടെയും വിനോദസഞ്ചാരികളുടെയും അനിയന്ത്രിതമായ കടന്നുകയറ്റം മൂലം ഹിമാലയത്തിന്റെ പ്രകൃതിസന്തുലിതാവസ്ഥ അതിവേഗം തകരുന്നു. എവറസ്റ്റ് ബേസ് ക്യാമ്പ് സ്ഥിതി ചെയ്യുന്ന ഖുംബു ഹിമാനി മനുഷ്യനിർമ്മിത ഇടപെടലുകൾ കാരണം അതിവേഗം ഉരുകി നശിക്കുന്നതായി നേപ്പാളിലെയും അമേരിക്കയിലെയും പ്രമുഖ ശാസ്ത്രജ്ഞർ ചേർന്ന് നടത്തിയ പുതിയ പഠനങ്ങൾ ചൂണ്ടിക്കാണിക്കുന്നു.
പർവതാരോഹണം ഒരു വാണിജ്യ വ്യവസായമായി മാറിയതോടെ, അത്യാധുനിക അടുക്കളകൾ, ഷവറുകൾ, ജനറേറ്ററുകൾ, കൃത്രിമമായി ചൂടുപിടിപ്പിക്കുന്ന തറകൾ എന്നിവയടങ്ങിയ ആയിരത്തഞ്ഞൂറിലധികം ടെന്റുകളാണ് ഓരോ സീസണിലും ഹിമാനിക്ക് മുകളിൽ ഉയർന്നുവരുന്നത്. ഇവിടെ പ്രവർത്തിക്കുന്ന യന്ത്രങ്ങളും താത്കാലിക നഗരങ്ങളും പുറന്തള്ളുന്ന അമിത ചൂട് ആയിരക്കണക്കിന് വർഷങ്ങൾ പഴക്കമുള്ള ഐസ് പാളികളെ അതിവേഗം ദ്രവിപ്പിക്കുകയാണ്. നിർജ്ജലീകരണം തടയാൻ പർവതാരോഹകർ അമിതമായി വെള്ളം കുടിക്കുന്നതിനാൽ ഒരു സീസണിൽ പ്രതിദിനം അയ്യായിരത്തിലധികം ലിറ്റർ മൂത്രമാണ് ഇവിടെ ഉണ്ടാകുന്നത്. ശരീര താപനിലയായ 37 ഡിഗ്രി സെൽഷ്യസിൽ പുറന്തള്ളപ്പെടുന്ന ഈ മൂത്രം ഐസിലേക്ക് പതിക്കുമ്പോൾ ഒരു സീസണിൽ മാത്രം നൂറിലധികം ടൺ ഐസ് ഉരുകിപ്പോകുന്നുണ്ടെന്നാണ് ഗവേഷകരുടെ കണക്കുകൂട്ടൽ. ശരീരമാലിന്യങ്ങൾ മൂലമുള്ള ചൂട് ചെറിയൊരു ഭാഗത്തെയാണ് ബാധിക്കുന്നതെങ്കിലും, ഒരിടത്ത് തന്നെ ഇത് അടിഞ്ഞുകൂടുന്നത് ഗുരുതരമായ പാരിസ്ഥിതിക ആഘാതമാണ് ഉണ്ടാക്കുന്നത്.
എന്നാൽ, ഹിമാനികൾ ഉരുകുന്നതിന് ഏറ്റവും പ്രധാന കാരണം ഫോസിൽ ഇന്ധനങ്ങളുടെ അനിയന്ത്രിതമായ ഉപയോഗമാണ്. തണുപ്പിൽനിന്ന് രക്ഷനേടാനും ഭക്ഷണമുണ്ടാക്കാനും വൈദ്യുതി ഉത്പാദിപ്പിക്കാനുമായി ടൺ കണക്കിന് എൽ.പി.ജി സിലിണ്ടറുകൾ, മണ്ണെണ്ണ, പെട്രോൾ എന്നിവയാണ് ബേസ് ക്യാമ്പുകളിൽ കത്തിക്കുന്നത്. മനുഷ്യൻ സൃഷ്ടിക്കുന്ന താപ ഉത്പാദനത്തിന്റെ തൊണ്ണൂറു ശതമാനത്തിലധികവും ഫോസിൽ ഇന്ധനങ്ങൾ കത്തുന്നതു മൂലമാണ് ഉണ്ടാകുന്നത്. ഇതിന്റെ ഫലമായി, ബേസ് ക്യാമ്പ് നിലനിൽക്കുന്ന പ്രദേശത്തെ താപനില ഖുംബു ഹിമാനിയുടെ മറ്റ് ഭാഗങ്ങളെ അപേക്ഷിച്ച് പ്രതിവർഷം കാൽ ഡിഗ്രിയോളം വർദ്ധിക്കുന്നു. രണ്ടായിരം ആണ്ടിനു ശേഷം ഹിമാലയത്തിലെ ഐസ് നഷ്ടപ്പെടുന്നതിന്റെ വേഗത ഇരട്ടിയായതായി അന്താരാഷ്ട്ര ശാസ്ത്ര മാസികകളിലെ റിപ്പോർട്ടുകളും വ്യക്തമാക്കുന്നുണ്ട്.
ഹിമാനികൾ ഉരുകിയൊലിക്കുന്നത് മൂലം മലനിരകളിൽ കൂറ്റൻ ഹിമാനി തടാകങ്ങൾ രൂപപ്പെടുകയും അവ പൊട്ടിത്തെറിച്ച് വൻ വെള്ളപ്പൊക്കങ്ങൾ ഉണ്ടാവുകയും ചെയ്യുന്നുണ്ട്. ആയിരത്തിലധികം മനുഷ്യജീവനുകൾ കവർന്ന ദുരന്തങ്ങൾ നേപ്പാളിലും സമീപ പ്രദേശങ്ങളിലും അടുത്തിടെ റിപ്പോർട്ട് ചെയ്തിരുന്നു. കുന്നിൻചെരുവുകളിലെ ഗ്രാമങ്ങളെ തകർത്തെറിയുന്ന ഇത്തരം ദുരന്തങ്ങൾ ഇന്ത്യ, നേപ്പാൾ, ചൈന എന്നീ രാജ്യങ്ങളിലെ ദശലക്ഷക്കണക്കിന് ജനങ്ങളുടെ നിലനിൽപ്പിന് കടുത്ത ഭീഷണിയാകുന്നു.
ഈ സാഹചര്യത്തിൽ എവറസ്റ്റ് ബേസ് ക്യാമ്പ് ഖുംബു ഹിമാനിയിൽ നിന്ന് തെക്കുപടിഞ്ഞാറുള്ള സുരക്ഷിത മേഖലകളിലേക്ക് മാറ്റിസ്ഥാപിക്കണമെന്ന് വിദഗ്ധർ ശുപാർശ ചെയ്യുന്നുണ്ട്. എന്നാൽ സ്ഥലം മാറ്റുന്നത് പർവതാരോഹകരുടെ സുരക്ഷയെ ബാധിക്കാനും പുതിയ പാരിസ്ഥിതിക നാശങ്ങൾക്ക് വഴിവെക്കാനും സാധ്യതയുള്ളതിനാൽ വലിയ വെല്ലുവിളിയാണ് ഉയർത്തുന്നത്. ഫോസിൽ ഇന്ധനങ്ങളുടെ ഉപയോഗം പൂർണ്ണമായി നിരോധിച്ച് സൗരോർജ്ജ സംവിധാനങ്ങളിലേക്ക് മാറുക, കൃത്യമായ മാലിന്യ സംസ്കരണ ശാലകൾ സ്ഥാപിക്കുക, പർവതാരോഹകരുടെ എണ്ണം പരിമിതപ്പെടുത്തുക തുടങ്ങിയ കർശന നിയന്ത്രണങ്ങളിലൂടെ മാത്രമേ ഹിമാലയൻ താഴ്വരയെ വരാനിരിക്കുന്ന വൻ വിപത്തിൽ നിന്ന് രക്ഷിക്കാൻ സാധിക്കൂ എന്ന് പഠനങ്ങൾ വ്യക്തമാക്കുന്നു.
