വാഷിങ്ടൺ: അമേരിക്കയിലെ വാഷിങ്ടൺ സ്റ്റേറ്റിൽ ഇന്ത്യൻ അമേരിക്കൻ സമൂഹത്തിനൊപ്പം ദീപാവലി ആഘോഷങ്ങളിൽ പങ്കുചേർന്ന് ഗവർണർ ബോബ് ഫെർഗൂസൻ. സ്റ്റേറ്റ് ലെജിസ്ലേറ്റീവ് കെട്ടിടത്തിൽ നടന്ന വിപുലമായ ആഘോഷ പരിപാടിയിൽ വെച്ച്, ഞായറാഴ്ച വാഷിങ്ടൺ സ്റ്റേറ്റ് ദീപാവലി ദിനമായി അദ്ദേഹം പ്രഖ്യാപിച്ചു.
വാഷിങ്ടണിന്റെ സമഗ്ര പുരോഗതിക്കും വളർച്ചയ്ക്കും ഇന്ത്യൻ അമേരിക്കൻ സമൂഹം നൽകുന്ന നിസ്തുലമായ സംഭാവനകളെ ഗവർണർ പരിപാടിയിൽ പ്രശംസിച്ചു. കഴിഞ്ഞ പത്ത് വർഷത്തിനിടയിൽ അമേരിക്കയിൽ ഏറ്റവും വേഗത്തിൽ ഇന്ത്യൻ അമേരിക്കൻ ജനസംഖ്യ വളർച്ച കൈവരിച്ച സംസ്ഥാനങ്ങളിൽ ഒന്നാണ് വാഷിങ്ടൺ എന്ന് അദ്ദേഹം ചൂണ്ടിക്കാട്ടി. രാജ്യത്തെ ഏറ്റവും വലിയ ഇന്ത്യൻ സമൂഹങ്ങളിലൊന്നിന് ആതിഥേയത്വം വഹിക്കാൻ സാധിക്കുന്നതിൽ സംസ്ഥാനത്തിന് വലിയ അഭിമാനമുണ്ടെന്നും അദ്ദേഹം വ്യക്തമാക്കി.
ഇന്ത്യൻ കോൺസുൽ ജനറലും സെനറ്റർ മങ്ക ഡിംഗ്രയും ഉൾപ്പെടെ നിരവധി പ്രമുഖ വ്യക്തികൾ ചടങ്ങിൽ പങ്കെടുത്തു. ദീപാവലി ആഘോഷങ്ങളിൽ പങ്കാളികളാകുന്ന എല്ലാവർക്കും ഗവർണർ ഹൃദയം നിറഞ്ഞ ആശംസകൾ നേർന്നു. ആഘോഷ ചടങ്ങുകളുടെ ചിത്രങ്ങൾ അദ്ദേഹം പിന്നീട് സമൂഹ മാധ്യമങ്ങളിൽ പങ്കുവെക്കുകയും ചെയ്തു.
