ന്യൂഡൽഹി: ഫോൺ നമ്പർ പങ്കുവയ്ക്കാതെ യൂസർനെയിം ഉപയോഗിച്ച് ആശയവിനിമയം നടത്താൻ സഹായിക്കുന്ന വാട്സ്ആപ്പിന്റെ പുതിയ ‘യൂസർനെയിം’ ഫീച്ചർ ഇന്ത്യയിൽ നിലവിൽ നടപ്പാക്കില്ലെന്ന് കേന്ദ്ര സർക്കാർ വ്യക്തമാക്കി. ഫീച്ചറിന്റെ സുരക്ഷാ-സ്വകാര്യതാ വശങ്ങൾ സംബന്ധിച്ച ചർച്ചകൾ പൂർത്തിയാകുന്നതുവരെ ഇന്ത്യയിൽ ഇത് അവതരിപ്പിക്കരുതെന്ന് കേന്ദ്രം മെറ്റയ്ക്ക് നിർദേശം നൽകിയിട്ടുണ്ട്.
യൂസർനെയിം സംവിധാനം വ്യാജ അക്കൗണ്ടുകൾ, വ്യക്തിചമയൽ (ഇംപേഴ്സണേഷൻ), സൈബർ തട്ടിപ്പുകൾ എന്നിവയ്ക്ക് വഴിവെക്കുമെന്ന ആശങ്കയാണ് സർക്കാരിന് ഉള്ളത്. ഇതുസംബന്ധിച്ച് വിശദീകരണം നൽകാൻ മെറ്റയോട് കേന്ദ്രം ആവശ്യപ്പെട്ടിട്ടുമുണ്ട്.
അതേസമയം, ഉപയോക്താക്കൾ ആശങ്കപ്പെടേണ്ട സാഹചര്യമില്ലെന്ന് മെറ്റ പ്രതികരിച്ചു. പുതിയ ഫീച്ചർ ഐച്ഛികമാണെന്നും ഫോൺ നമ്പർ മറച്ചുവെച്ച് ആശയവിനിമയം നടത്താൻ സഹായിക്കുന്ന സ്വകാര്യതാ സൗകര്യമായാണ് ഇത് രൂപകൽപന ചെയ്തിരിക്കുന്നതെന്നും കമ്പനി അറിയിച്ചു. യൂസർനെയിമുകൾ പൊതുവായി തിരയാൻ കഴിയില്ലെന്നും കൃത്യമായ യൂസർനെയിം അറിയുന്നവർക്ക് മാത്രമേ ബന്ധപ്പെടാനാകൂ എന്നും മെറ്റ വിശദീകരിച്ചു.
സർക്കാരുമായുള്ള കൂടിയാലോചനകൾ പൂർത്തിയാകുന്നതുവരെ ഇന്ത്യയിൽ ഫീച്ചർ അവതരിപ്പിക്കില്ലെന്നാണ് നിലവിലെ നിലപാട്.
