സിഡ്നി: യുവതലമുറയെ ശാക്തീകരിക്കുന്നതിനും അവർക്ക് നേതൃത്വപരമായ അവസരങ്ങൾ ഒരുക്കുന്നതിനുമുള്ള പ്രതിബദ്ധത ഊട്ടിയുറപ്പിച്ച് വേൾഡ് മലയാളി കൗൺസിൽ (ഡബ്ല്യുഎംസി) സിഡ്നി പ്രൊവിൻസ്. ഈ വർഷത്തെ ഓണാഘോഷ പരിപാടികൾക്ക് നേതൃത്വം നൽകുന്നതിനായി തിരഞ്ഞെടുത്ത യുവ പ്രതിഭകളെ സംഘടന പരിചയപ്പെടുത്തി.
പരിപാടികളുടെ അവതാരകരായി (എംസി) നൂറ മാലിക്, നിരഞ്ജൻ ശ്രീജിത്ത് എന്നിവരെയും ടീം ക്യാപ്റ്റനായി ശ്രുതി സുനിലിനെയും തിരഞ്ഞെടുത്തു. പ്രവാസലോകത്ത് യുവതലമുറയ്ക്ക് സാംസ്കാരിക കൂട്ടായ്മകളിലും നേതൃത്വപരമായ ചുമതലകളിലും അർഹമായ ഇടം നൽകുക എന്ന ലക്ഷ്യത്തോടെയാണ് പുതിയ പ്രതിഭകളെ ഈ ചുമതലകൾ ഏൽപ്പിച്ചിരിക്കുന്നത്.
ഡബ്ല്യുഎംസി സിഡ്നി പ്രൊവിൻസിന്റെ ആഭിമുഖ്യത്തിലുള്ള വിപുലമായ ഓണാഘോഷ പരിപാടികൾ 2026 സെപ്റ്റംബർ 19 ശനിയാഴ്ച രാവിലെ 10 മണി മുതൽ മെഡോബാങ്കിലെ മാർസ്ഡൻ സ്കൂൾ ഹാളിൽ വെച്ച് നടക്കും. തനത് സംസ്കാരവും കൂട്ടായ്മയും യുവശക്തിയുടെ നേതൃപാടവവും ഒത്തുചേരുന്ന ഈ ആഘോഷത്തിലേക്ക് മുഴുവൻ പ്രവാസി മലയാളി കുടുംബങ്ങളെയും സ്വാഗതം ചെയ്യുന്നതായി ഭാരവാഹികൾ അറിയിച്ചു.
