സിഡ്നി: ഔപചാരിക യൂണിവേഴ്സിറ്റി ബിരുദങ്ങളില്ലാതെ തന്നെ ഓസ്ട്രേലിയയിൽ ലക്ഷക്കണക്കിന് രൂപ (ആറക്ക ശമ്പളം) വാർഷിക വരുമാനം നേടാൻ കഴിയുന്ന മികച്ച തൊഴിൽ മേഖലകളുടെ വിവരങ്ങൾ പുറത്തുവിട്ടു. പ്രമുഖ തൊഴിൽ പോർട്ടലായ ‘സീക്ക്’ (SEEK) പുറത്തുവിട്ട ഏറ്റവും പുതിയ ഡാറ്റയിലാണ് ഈ വിവരങ്ങൾ വ്യക്തമാക്കുന്നത്. വലിയ തോതിൽ ബിരുദങ്ങൾ നേടിയവർക്ക് മാത്രമല്ല, പ്രായോഗിക തൊഴിൽ പരിചയവും സാങ്കേതിക നൈപുണ്യവു മുള്ളവർക്കും മികച്ച വരുമാനമുള്ള കരിയർ സ്വന്തമാക്കാൻ സാധിക്കുമെന്ന് ഈ റിപ്പോർട്ട് വ്യക്തമാക്കുന്നു.
കൺസ്ട്രക്ഷൻ, മൈനിംഗ്, ഊർജ്ജം, തുറമുഖം തുടങ്ങിയ മേഖലകളിലെ വിവിധ ട്രേഡ് ജോലികളിലാണ് ഉയർന്ന ശമ്പളം ലഭിക്കുന്ന മികച്ച അവസരങ്ങളുള്ളത്. രാജ്യത്ത് പരസ്യപ്പെടുത്തിയ തൊഴിൽ ശമ്പളങ്ങളിൽ വലിയ വർദ്ധനവാണ് രേഖപ്പെടുത്തുന്നത്. ടാസ്മാനിയയിൽ വാർഷിക ശമ്പള വളർച്ച 5.6 ശതമാനമായി ഉയർന്നപ്പോൾ കൺസ്ട്രക്ഷൻ രംഗത്ത് 5.2 ശതമാനവും, മൈനിങ്-റിസോഴ്സസ്-എനർജി മേഖലകളിൽ ദേശീയ ശരാശരിയേക്കാൾ കൂടുതലായി 4.5 ശതമാനവും ശമ്പള വളർച്ച രേഖപ്പെടുത്തിയിട്ടുണ്ട്.
ശാരീരിക അധ്വാനമുള്ള ജോലികളോ പഠനത്തോടൊപ്പം തൊഴിലോ ചെയ്യാൻ ആഗ്രഹിക്കുന്നവർക്ക് വൻതോതിൽ സമ്പാദിക്കാൻ ഇത്തരം ട്രേഡ് പാതകൾ സഹായകരമാണെന്ന് സീക്ക് ചീഫ് ഇക്കണോമിസ്റ്റ് ഡോ. ബ്ലെയർ ചാപ്മാൻ വ്യക്തമാക്കി. ഔപചാരിക യൂണിവേഴ്സിറ്റി ബിരുദങ്ങൾ ആവശ്യമില്ലെങ്കിലും ഇതിൽ പല ജോലികൾക്കും കൃത്യമായ ട്രെയിനിങ്ങോ, ലൈസൻസോ, പ്രായോഗിക പരിചയമോ ആവശ്യമാണ്. റിപ്പോർട്ട് പ്രകാരം മൈനിങ് മേഖലയിൽ പ്രവർത്തിക്കുന്ന ഷിഫ്റ്റ് സൂപ്പർവൈസർമാർക്ക് ശരാശരി 196,425 ഡോളർ വരെയാണ് വാർഷിക ശമ്പളം ലഭിക്കുന്നത്. ഇലക്ട്രീഷ്യൻമാർക്ക് മൈനിങ് മേഖലയിൽ ശരാശരി 154,286 ഡോളറും, മെക്കാനിക് & ഫീൽഡ് സർവീസ് ടെക്നീഷ്യൻമാർക്ക് 145,000 ഡോളറിലധികവും വാർഷിക വരുമാനം ലഭിക്കുന്നുണ്ട്. കപ്പലുകളിൽ നിന്ന് ചരക്കുകൾ കയറ്റിയിറക്കുന്ന സ്റ്റീവഡോർ (തുറമുഖ തൊഴിലാളി) തസ്തികയ്ക്ക് ശരാശരി 134,756 ഡോളറാണ് വാർഷിക വരുമാനം.
വൻകിട ഇൻഫ്രാസ്ട്രക്ചർ പദ്ധതികളും ഖനന മേഖലയിലെ വിദഗ്ധ തൊഴിലാളികളുടെ നിരന്തരമായ ആവശ്യകതയുമാണ് ഈ തൊഴിലുകളുടെ വേതനം ഇത്രയധികം ഉയരാൻ കാരണമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. ദീർഘകാലത്തെ യൂണിവേഴ്സിറ്റി പഠനത്തിന് സമയം ചിലവഴിക്കാതെ സ്കിൽഡ് ട്രേഡുകളിലൂടെ മികച്ച സാമ്പത്തിക ഭദ്രത നേടാൻ ആഗ്രഹിക്കുന്നവർക്ക് ഈ മേഖലകൾ വലിയ അവസരങ്ങളാണ് തുറന്നുനൽകുന്നത്
