സിഡ്നി: ഓസ്ട്രേലിയൻ ഇന്റർനെറ്റ് ഉപയോക്താക്കളുടെ സ്വകാര്യ വിവരങ്ങളും പാസ്വേഡുകളും ഡാർക്ക് വെബിൽ ചുളുവിലയ്ക്ക് വിൽക്കപ്പെടുന്നതായി സൈബർ സുരക്ഷാ വിദഗ്ധരുടെ മുന്നറിയിപ്പ്. ബാങ്ക് വിവരങ്ങൾ, സോഷ്യൽ മീഡിയ പ്രൊഫൈലുകൾ, പാസ്പോർട്ട് സ്കാനുകൾ എന്നിവയടങ്ങിയ ഒരു വ്യക്തിയുടെ പൂർണ്ണമായ ഡിജിറ്റൽ വിവരങ്ങൾ (Complete Identity Package) വെറും 200 ഡോളറിന് (ഏകദേശം 16,500 രൂപ) ലഭ്യമാണെന്ന് സൈബർ സുരക്ഷാ കമ്പനിയായ നോർഡ് വിപിഎൻ (NordVPN) വെളിപ്പെടുത്തി.
2026-ന്റെ ആദ്യ പാദത്തിൽ മാത്രം ഏകദേശം 1.1 ദശലക്ഷം ഓസ്ട്രേലിയൻ അക്കൗണ്ടുകൾ ചോർന്നതായാണ് കണക്കാക്കുന്നത്. അമേരിക്കൻ പൗരന്മാരുടെ വിവരങ്ങളെ അപേക്ഷിച്ച് ഓസ്ട്രേലിയക്കാരുടെ വിവരങ്ങൾക്ക് ഡാർക്ക് വെബിൽ ആറിരട്ടി വരെ വില കൂടുതലാണെന്നും റിപ്പോർട്ടുകൾ സൂചിപ്പിക്കുന്നു. വിപണിയിൽ ഓസ്ട്രേലിയൻ വിവരങ്ങളുടെ ലഭ്യത കുറവായതാണ് ഇതിന് കാരണം.
ഡാർക്ക് വെബിലെ വിലവിവരങ്ങൾ ഇങ്ങനെ:
പേയ്മെന്റ് കാർഡുകൾ: 10 ഡോളർ
ഡിജിറ്റൽ പാസ്പോർട്ട് സ്കാൻ: 32 ഡോളർ
ഫേസ്ബുക്ക് അക്കൗണ്ട്: 38 ഡോളർ
ടിക്ടോക് അക്കൗണ്ട്: 60 ഡോളർ
മൈക്രോസോഫ്റ്റ് ഓഫീസ് 365 അക്കൗണ്ട്: 26.50 ഡോളർ
വ്യക്തിഗത ഇമെയിൽ അക്കൗണ്ടുകൾ: 1 ഡോളർ മുതൽ
ഒരിക്കൽ വിവരങ്ങൾ ചോർന്നാൽ അവ തിരിച്ചുപിടിക്കുക എന്നത് ഏറെ പ്രയാസകരമായ ദൗത്യമാണെന്ന് വിദഗ്ധർ ചൂണ്ടിക്കാട്ടുന്നു. സുരക്ഷ ഉറപ്പാക്കുന്നതിനായി ഓരോ അക്കൗണ്ടിനും വ്യത്യസ്തമായ പാസ്വേഡുകൾ ഉപയോഗിക്കണമെന്നും മൾട്ടി-ഫാക്ടർ ഓതന്റിക്കേഷൻ (MFA) നിർബന്ധമായും നടപ്പിലാക്കണമെന്നും നിർദ്ദേശമുണ്ട്.
ബാങ്ക് അക്കൗണ്ടുകളിലെ അസാധാരണമായ ഇടപാടുകൾ ശ്രദ്ധിക്കുക, അപരിചിതമായ സ്ഥലങ്ങളിൽ നിന്നുള്ള ലോഗിൻ ശ്രമങ്ങൾ നിരീക്ഷിക്കുക എന്നിവയിലൂടെ വിവരങ്ങൾ ചോർന്നോ എന്ന് പ്രാഥമികമായി കണ്ടെത്താനാകും. ഇതിനുപുറമെ, സ്വന്തം വിവരങ്ങൾ ഡാർക്ക് വെബിൽ എത്തിയിട്ടുണ്ടോ എന്ന് പരിശോധിക്കാനുള്ള ‘ഡാർക്ക് വെബ് മോണിറ്ററിംഗ്’ സംവിധാനങ്ങൾ ഉപയോഗിക്കുന്നത് സുരക്ഷ വർദ്ധിപ്പിക്കാൻ സഹായിക്കും
