ന്യൂഡൽഹി: ഇന്ത്യയിലെ സെമികണ്ടക്ടർ മേഖലയിലെ കമ്പനികൾ ഇതുവരെ 1.4 ബില്യൺ ഡോളർ (ഏകദേശം 1.34 ലക്ഷം കോടി രൂപ) ഇക്വിറ്റി ഫണ്ടിങ് സമാഹരിച്ചതായി ട്രാക്സ്ന്റെ കണക്കുകൾ. 281 കമ്പനികളിലായാണ് ഈ നിക്ഷേപം ലഭിച്ചത്. ഇതിൽ 701 മില്യൺ ഡോളർ 2025ന് ശേഷമാണ് സമാഹരിച്ചത്.
2026ൽ ഇതുവരെ മാത്രം സെമികണ്ടക്ടർ മേഖലയിലെ കമ്പനികൾ 228 മില്യൺ ഡോളർ ഫണ്ടിങ് നേടിയിട്ടുണ്ട്. ഇന്ത്യയിലെ സെമികണ്ടക്ടർ മേഖലയുമായി ബന്ധപ്പെട്ട 3,557 കമ്പനികളിൽ 281 കമ്പനികൾക്ക് ഫണ്ടിങ് ലഭിച്ചിട്ടുണ്ടെന്നും ഇതിൽ 142 കമ്പനികൾ ഇക്വിറ്റി ഫണ്ടിങ് നേടിയിട്ടുണ്ടെന്നും ട്രാക്സ്ന്റെ കണക്കുകൾ വ്യക്തമാക്കുന്നു.
ബെംഗളൂരുവിന് മുന്നേറ്റം
രാജ്യത്തെ സെമികണ്ടക്ടർ മേഖലയിലെ ഇക്വിറ്റി ഫണ്ടിങ്ങിൽ 40.1 ശതമാനം ബെംഗളൂരുവുമായി ബന്ധപ്പെട്ട കമ്പനികളിലേക്കാണ് എത്തിയത്. സെമികണ്ടക്ടർ കമ്പനികളുടെ നിക്ഷേപകരുടെ എക്സിറ്റ് മാർഗങ്ങളിൽ ഏറ്റെടുക്കലുകൾക്കും പ്രധാന പങ്കുണ്ട്. ലഭ്യമായ കണക്കുകൾ പ്രകാരം 62 ഏറ്റെടുക്കലുകൾ നടന്നപ്പോൾ 42 കമ്പനികൾ ഐപിഒയിലേക്ക് കടന്നു.
ഇന്ത്യയിൽ സെമികണ്ടക്ടർ നിർമാണശേഷി വികസിപ്പിക്കുന്നതിനായി സർക്കാർ വിവിധ പദ്ധതികൾക്ക് അംഗീകാരം നൽകിയിട്ടുണ്ട്. ആറ് സംസ്ഥാനങ്ങളിലായി 12 സെമികണ്ടക്ടർ പദ്ധതികൾക്ക് അംഗീകാരം ലഭിച്ചതായും ഇവയിലൂടെ 1.64 ലക്ഷം കോടി രൂപയിലധികം നിക്ഷേപ പ്രതിബദ്ധതയുണ്ടെന്നും റിപ്പോർട്ടുകൾ വ്യക്തമാക്കുന്നു. മൂന്ന് പദ്ധതികൾ ഇതിനകം വാണിജ്യ ഉൽപാദനം ആരംഭിച്ചിട്ടുണ്ട്.
ഇന്ത്യയുടെ സെമികണ്ടക്ടർ മേഖലയിലെ വളർച്ചയുടെ പശ്ചാത്തലത്തിലാണ് സെമികോൺ ഇന്ത്യ 2026 സെപ്റ്റംബർ 17 മുതൽ 19 വരെ ന്യൂഡൽഹിയിലെ യശോഭൂമിയിൽ നടക്കുന്നത്. ഇന്ത്യ സെമികണ്ടക്ടർ മിഷന്റെ ഔദ്യോഗിക വിവരമനുസരിച്ച് 300ലധികം ഇന്ത്യൻ കമ്പനികളുടെ പങ്കാളിത്തമാണ് പ്രതീക്ഷിക്കുന്നത്.
സെമികണ്ടക്ടർ ഡിസൈൻ, നിർമാണം, പാക്കേജിങ്, ടെസ്റ്റിങ്, ഉപകരണങ്ങൾ, ഗവേഷണം തുടങ്ങിയ മേഖലകളിൽ ആഭ്യന്തര ശേഷി വികസിപ്പിക്കുകയാണ് ഇന്ത്യയുടെ നിലവിലെ സെമികണ്ടക്ടർ നയത്തിന്റെ പ്രധാന ലക്ഷ്യങ്ങളിൽ ഒന്ന്.
