മെൽബൺ: ഓസ്ട്രേലിയയിലെ വിക്ടോറിയയിലുള്ള 165 വർഷത്തിലേറെ പഴക്കമുള്ള പൗരാണിക വെസ്ലിയൻ മെത്തഡിസ്റ്റ് ദേവാലയം മസ്ജിദായി മാറുന്നു. ഓഗസ്റ്റ് 1-ന് ‘കിൽമോർ ഇസ്ലാമിക് ആൻഡ് കമ്മ്യൂണിറ്റി സെന്ററിന്റെ’ നേതൃത്വത്തിൽ സംഘടിപ്പിച്ച പണസമാഹരണ ചടങ്ങോടെയാണ് ചരിത്രപ്രസിദ്ധമായ ഈ കെട്ടിടത്തിന്റെ പുതിയ മാറ്റത്തിന് വേഗം കൂടിയത്.
കിൽമോറിലെ പൗലെറ്റ് സ്ട്രീറ്റിൽ (25 Powlett Street) 1858-ൽ വിക്ടോറിയൻ ഗോൾഡ് റഷ് കാലഘട്ടത്തിൽ നിർമ്മിക്കപ്പെട്ട ഈ ചരിത്ര സ്മാരകം, ജനസംഖ്യാ വ്യതിയാനവും വിശ്വാസികളുടെ കുറവും മൂലമാണ് വർഷങ്ങൾക്ക് മുൻപ് പ്രവർത്തനം അവസാനിപ്പിച്ചത്. ഓസ്ട്രേലിയയിലുടനീളം ക്രിസ്ത്യൻ വിശ്വാസികളുടെ എണ്ണം കുറയുകയും പഴയ കെട്ടിടങ്ങളുടെ പരിപാലനച്ചെലവ് വർദ്ധിക്കുകയും ചെയ്തതോടെ നിരവധി ദേവാലയങ്ങൾ വിറ്റഴിക്കപ്പെട്ടിരുന്നു.
അതേസമയം, വിക്ടോറിയൻ മേഖലകളിൽ മുസ്ലിം ജനസംഖ്യയിലുണ്ടായ വലിയ വളർച്ചയെ തുടർന്ന് താൽക്കാലിക കേന്ദ്രങ്ങളിൽ ആരാധന നടത്തിയിരുന്ന മുസ്ലിം സമൂഹങ്ങൾ കൂടുതൽ സ്ഥിരതയുള്ള കേന്ദ്രങ്ങൾ തേടുകയായിരുന്നു. കെട്ടിടത്തിന്റെ പൗരാണിക ഭംഗിയും വാസ്തുവിദ്യാ മൂല്യവും തെല്ലും ചോരാതെ തന്നെയാണ് കിൽമോർ ഇസ്ലാമിക് ആൻഡ് കമ്മ്യൂണിറ്റി സെന്റർ ഇതിനെ മസ്ജിദും കമ്മ്യൂണിറ്റി കേന്ദ്രവുമായി പുനരുദ്ധരിക്കുന്നത്.
സ്ട്രാത്ത്മോർ, ക്രെയ്ഗിബേൺ, ജീലോങ് തുടങ്ങി വിക്ടോറിയയിലെ മറ്റ് പ്രദേശങ്ങളിലും സമാനമായ രീതിയിൽ പഴയ ദേവാലയങ്ങൾ മസ്ജിദുകളായി മാറിയിട്ടുണ്ട്. ഒരു മതവിഭാഗത്തിന്റെ പതനമോ മറ്റൊന്നിന്റെ കടന്നുവരവോ ആയി കാണുന്നതിന് പകരം, ആരാധനാലയങ്ങൾ നിർമ്മിക്കപ്പെട്ട പ്രാഥമിക ഉദ്ദേശ്യം നിലനിർത്തിക്കൊണ്ടുള്ള ഈ മാറ്റത്തെ നവീകരണത്തിന്റെയും തുടർച്ചയുടെയും അപൂർവ്വ കാഴ്ചയായാണ് സാമൂഹിക നിരീക്ഷകർ വിലയിരുത്തുന്നത്.
