വാഷിംഗ്ടൺ: ലോകം ഉറ്റുനോക്കുന്ന യുഎസ്-ഇറാൻ ആണവ ചർച്ചകൾക്ക് ഫെബ്രുവരി 6 ന് ഒമാനിൽ തുടക്കമാകും. ഇറാന്റെ പ്രത്യേക അഭ്യർത്ഥന കണക്കിലെടുത്ത് ചർച്ചാ വേദി തുർക്കിയിൽ നിന്ന് ഒമാനിലേക്ക് മാറ്റാൻ അമേരിക്കൻ പ്രസിഡന്റ് ഡൊണാൾഡ് ട്രംപ് സമ്മതിച്ചതോടെയാണ് അനിശ്ചിതത്വത്തിലായിരുന്ന ചർച്ചകൾക്ക് വഴിതുറന്നത്. ഒരു ധാരണയിലെത്താൻ സാധിച്ചില്ലെങ്കിൽ ‘മോശം കാര്യങ്ങൾ’ സംഭവിക്കുമെന്ന് ട്രംപ് നേരത്തെ നൽകിയ കർശന മുന്നറിയിപ്പ് ഇറാനു മേൽ വലിയ സമ്മർദ്ദമുണ്ടാക്കിയതായാണ് സൂചന.
പ്രാദേശിക സംഘർഷങ്ങൾ പരിഹരിക്കുന്നതിനായി അറബ് രാജ്യങ്ങൾ നടത്തിയ നയതന്ത്ര നീക്കങ്ങളാണ് ചർച്ചകൾ പുനരാരംഭിക്കാൻ പശ്ചാത്തലമൊരുക്കിയത്. ഒമാനിൽ നടക്കുന്ന ഈ നിർണ്ണായക കൂടിക്കാഴ്ചയിൽ മേഖലയിലെ മറ്റ് അറബ്, മുസ്ലീം രാജ്യങ്ങൾ കൂടി പങ്കുചേരുമോ എന്ന കാര്യത്തിൽ ചർച്ചകൾ നടന്നുവരികയാണെന്ന് നയതന്ത്ര പ്രതിനിധികൾ സൂചിപ്പിച്ചു. മേഖലയിലെ സമാധാനത്തിന് ഈ ചർച്ചകൾ അത്യന്താപേക്ഷിതമാണെന്നാണ് ലോകരാജ്യങ്ങളുടെ വിലയിരുത്തൽ.
അതേസമയം, ഗൾഫ് മേഖലയിൽ പിരിമുറുക്കം തുടരുന്നതിനിടെ ചൊവ്വാഴ്ച അറേബ്യൻ കടലിൽ അമേരിക്കൻ വിമാനവാഹിനിക്കപ്പലായ ‘എബ്രഹാം ലിങ്കണെ’ ആക്രമിക്കാൻ ശ്രമിച്ച ഇറാനിയൻ ഡ്രോൺ യുഎസ് സൈന്യം വെടിവെച്ചിട്ടിരുന്നു. ഈ പ്രകോപനങ്ങൾക്കിടയിലും നയതന്ത്ര ചർച്ചകളുമായി മുന്നോട്ട് പോകാനാണ് വൈറ്റ് ഹൗസിന്റെ തീരുമാനം. ഇറാനുമായുള്ള ഔദ്യോഗിക ചർച്ചകൾ ഈ ആഴ്ച അവസാനം നടക്കുമെന്ന് വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് സ്ഥിരീകരിച്ചു
